Dos hòmber ku a bai pa atraká restorant Burger King arestá

Polisnan a aktua rápidamente riba e yamada

206
Willemstad—– Bon trabou di Polis a pone ku a logra di detené dos tipo ku tabata kla pa atraká e restorant Burger King riba Gosieweg.

Djaluna 10 di desèmber 2018 alrededor di 09.40 or, Sentral di Polis a risibí notifikashon di un atrako ku ta tumando lugá den un restorant di ‘fastfood’ riba Gosieweg.

Mesora a dirigí unidatnan na e sitio pa asina por detené e sospechosonan ku tabata den e restorant. Nèt na momento ku polisnan a yega na e restorant Burger king a bin topa ku un di e atrakadornan saliendo di e porta patras kual mesora a ser ordená pa drumi abou na suela. E otro mirando ku e negoshi ya tabata rondoná pa polis a trata di Sali via di e bentana pero ya einan tambe tabatin polis para ku mesora a pone e tambe drumi abou pa asina por a detené. Loke ku a keda e polisnan straño ku no a haña e sospechosonan ku arma i mesora a bai den e restorant pa kuminsá buska pa wak unda e armanan por a ser skondí.  Na e sitio polis a detené e hòmbernan sospechoso:

A.A.J. di 22 aña di edat;

S.W.R di 26 aña di edat, ámbos nasé na Kòrsou.

Den e restorant polis a haña i konfiská den un baki di tira sushi aden:

Dos arma di kandela;

Hanskun;

Muts.

Probablemente e sospechosonan a pone tur e artíkulonan aki den e baki di tira sushi aden.

Tambe polis a konfiská e vehíkulo den kua e sospechosonan a bini aden.  Mester a pidi presensia di ambulans na e sitio  debí ku algun e trahadónan den e restorant di Burger King mester a bira malu i otro a kai den shòk na momento ku nan a tuma nota di e tipo atrakadónan.

A presentá ámbos sospechoso dilanti un Fiskal Ouksiliar ku a ordená nan enkarselamentu pendiente di mas investigashon.