Fundashon JAG su sede nobo ta na Braggas Palu Blanku

94
Esaki ta e sede nobo di Fundashon J.A.G.

WILLEMSTAD,—-Awe ‘E Mulina’, ta bolbe saka otro informashon di e organisashon ku ta para pa organisá temporada di Karnaval 2019.Ta trata aki di Fundashon J.A.G. ku tin Hubert “Juni” Aniceta na kabes, e mes un organisashon aki a organisá e temporada di Karnaval ku ta trata di lomba, i nan a hasi esaki eksitoso tambe.

Ta konosí ku Fundashon J.A.G. su sede tabata den mes un kura ku Zona Kultural kaminda ku ántes tabata Teater Luna Blou. Pero esaki ta bai tin un kambio kuné, di informashon ku a drenta serka di ‘E Mulina’, a bisa nos ku, for di siman pasa tabatin algun moveshon hopi straño den direkshon di Fundashon J.A.G.

E moveshon en kuestion a bai a base di kambio di sede. Manera ku nos a haña e informashon aki, nos a drenta kaya i asina kuminsá ku nos investigashon nan. Nos a bai para na punto nan stratégiko, pa asina nos por mira tur kos ta ku pasando den e direkshon ku nos a haña serka di nos fuente.

T’asina ku nos a mira en bèrdat algun moveshon ku persona nan ku ta forma parti di Fundashon J.A.G. tambe nos a tuma nota di presensia di Hubert “Juni” Aniceta na e adrès ku nos a haña serka di nos fuente, mas ku ayera nochi nos a kaba di haña e konfirmashon mes, ku ta na unda Fundashon J.A.G. su sede nobo lo bai ta. Awe nos tin e notisia ku e sede nobo di Fundashon J.A.G. lo bai ta na Braggas na Palu Blanku, tambe nos a haña informashon ku djadumingu awor lo bai tin apertura di nan sede nobo i tambe bendementu di karchi di Kassav, pues for di djadumingu awor i pa futuro Fundashon J.A.G. su sede ta na Braggas Palu Blanku.