Grupo Pila Di Ambiente ku CD nobo riba merkado

176
Nan ta 20 aña den mundu di Tambú.

WILLEMSTAD,—-Grupo di Tambú Pila Di Ambiente ku ta eksistí mas ku 20 aña I ku tin vários hit riba nan nòmber ta trese un mas CD nobo ku hopi kalidat titulá “Ban Ariba”. Sin ku e cd a sali ofisial e disko “Ban ariba” ku ta karga mesun nòmber ku e cd, a yega orea di pueblo kaba i kousa hopi furor den farándula di Tambú na Hulanda.

E piesa aki ta kanta pa Rincho X konosí di e piesa Frenemy ku aña pasa a zona stret den temporada di fin di aña I tambe Karnaval. Kompositor di “Ban Ariba” ta Howard Zink ku tin diferente hit riba su nòmber. Un di nan ta e disko ‘tene mi man’ ku tambe zona temporada di Karnaval 2018 kanta pa Hunnely.

Tur hende ku konosé Pila sa ku e grupo aki ta un grupo ku semper a drai hopi positivo. I ku nunka no a wòri masha na momento ku otro ta tira puña, òf manda kanto den nan direkshon manera ta konosí den Tambú. Pila semper a focus riba disko ku ta trese i sigurá un ambiente festivo.

Despues di a neglishá i wanta vários atake musikal, e rònt aki si Pila a disidí di mustra e pueblo ku si nan mester defendé nan tereno, nan ta ready pa hasi esaki ku hopi kalidat i ambiente manera ta nan kustumber. Aparte di ‘Ban ariba’ e cd tin 6 komposishon mas di entre otro Tula Bernardina, Rincho X i Howard Zink kanta pa Juny Stefania, Zuhgeli Marchena, Andy Stefania i Rincho X ku tambe ta zona tremendo.