A’s invikto den Junior i Senior su buèlta di eliminashon

76
Kampionato RBI den su rekta final.
WILLEMSTAD—Kampionato di RBI Curaçao 2018 yegando su rekta final i ekspektativanan ta haltu pa sa kua ta e ekiponan ku lo bai ku e títulonan e temporada aki. Manera ta konosí un kantidat rèkòrt di ekipo a partisipá den e aktual kampionato, 21 ekipo ku ta representá kasi 315 hóben ku tur fin di siman tabata práktika nan deporte faborito di beisbòl.

Aktualmente ta hungando den e buèlta di tripel eliminashon. Despues di e promé buèlta di tur kontra tur awor a drenta e buèlta ku e ekipo ku pèrdè tres wega ta keda eliminá for di e kampionato. E fin di siman tras di lomba tabata unu hopi interesante atrobe sigur awor ku e elemento di eliminashon riba mesa.

Den divishon Junior, Amerikanenkamp/Devil Rays i Marchena/Reds a kai afó i awor a sobra 7 ekipo. Remarkabel ta ku Trai Seru/Dodgers a sobrebibí dos wega di eliminashon pa mantené nan mes asina bibu den e kampionato.

Otro detaye ku a hala atenshon ta ku Brievengat/Orioles a mantené nan invikto, despues di a anotá 5 kareda den delaster ining pa laga Montaña Abou/Rangers den tereno 9-8. Brievengat/Orioles i St. Michiel/Athletics den Junior no a pèrdè ningun wega ainda den e buèlta di eliminashon aki.

Den Senior tambe Amerikanenkamp/Devil Rays a kai afó huntu ku Banda Bou/Cubs i asina a sobra 8 ekipo. St. Michiel/Athletics i Van Engelen/Giants ta e dos ekiponan den divishon Senior ku no a pèrdè wega ainda den e buèlta di eliminashon.

E resultadonan di e fin di siman tras di lomba tabata di siguiente manera:

Den divishon Junior na Tio Daou Ballpark, Amerikanenkamp/Devil Rays a kai vensí na man di Montaña Ariba/Diamonbacks ku skor di 18-4. St. Michiel/Athletics a gana di Van Engelen/Giants ku skor di 9-4.

Picher ganador tabata Joharvi Martinus i Cleavon Lasten a bai di 2-2 pa A’s. Picher pèrdèdó tabata D-Sean Wederfoort i mihó bate pa Giants tabata Juan Andres Valle di 2-2.

Den otro weganan, Trai Seru/Dodgers a gana di Amerikanenkamp/Devil Rays 15-0 i Brievengat/Orioles a gana Montaña Abou/Rangers 9-8.

Den divishon Senior na Montab, Montaña Ariba/Diamondbacks a gana di Amerikanenkamp/Devil Rays ku skor di 18-4. Trai Seru/Dodgers a gana Brievengat/Orioles 10-1. Marchena Reds a gana Montaña Ariba/Diamondbacks 9-6 i Trai Seru/Dodgers a gana di Bándabou/Cubs 12-5.

Den divishon Senior, Montaña Abou/Rangers a gana Sta. Maria/Pirates 5-2, Van Engelen/Giants a gana Marchena/Reds 5-4, St. Maria/Pirates a gana Montaña Ariba/Diamondbacks 11-1 i finalmente Trai Seru/Dodgers a gana Marchena/Reds 5-4.

Den Senior, Brievengat/Orioles a gana Bándabou/Cubs 7-2. Picher ganado tabata Dylan Harms i mihó bate pa Orioles tabata Colastica i Chirino di 2-1, picher pèrdèdó tabata Luciendry Monte i mihó bate pa Cubs tabata Aries, Streden i Tokaay tur di 2-1.

Van Engelen/Giants a gana Marchena/Reds 5-4, St. Michiel/Athletics a gana Sta. Rosa/Indians ku skor di 4-3 i Van Engelen/Giants a gana Sta. Maria/Pirates 5-1.

RBI Curaçao 2018 ta kai bou di ouspisio di Curaçao Baseball Development Foundation (CBDF) i kampionato ta bou di maneho di Fundashon pa Nan.

Nan ta gradisí MCB pa ta spònser prinsipal i Hensley Meulens pa donashon di tur bala i ku tur ekipo promé ku kampionato a risibí algun kaha di bala tambe pa nan respektivo organisashonnan i por último KNBSB.