Dimitri Leon ta logra su di 6 titulo di Kòrsou

122
E gran kampion, Dimitri Leon.
WILLEMSTAD—Djabièrnè último tabata fecha final di e kampionato nashonal di pinpòn. Esaki unda tabatin un bon asistensia, den weganan final ku a tuma lugá, den Sala Rekreo Irene Moreno na Muizenberg.

Den e promé wega di anochi, bálido pa B-klas, Dik Hendriks ta sa di bai ku e titulo, ganando di Mary Ann Mac Leod 3-1, ku parsialnan 7-11, 11-5, 11-9 i 11-7.

Despues tabatin  e partido den kategoria dòbel, kaminda e duo Devon Meilink i Henny Metry a gana fásilmente di Jaysron Mathilda i Ravi Rajwani ku skor di 3-0, ku parsialnan 11-5, 11-5, 11-5.

Pa loke ta e di 3 final di anochi, ku tabata bálido pa e kategoria Master, e wega tabata hopi pareu, pero asina mes ku mihó konsentrashon na final Raymond Begina ta gana di Hensley Wentwoord, ku skor di 3-2 ku parsialnan 13-11, 14-12, 7-11, 5-11, 11-4.

E plato prinsipal di anochi, tabata e último wega di dia, ku a bai entre Dimitri Leon i Devon Meilink. Esaki a bira e mihó wega, ku bon rèli. Dimitri finalmente ta bai ku e titulo máksimo, ganando e wega ku skor di 4-2. E parsialnan di e wega aki, tabata di 11-9, 11-9, 10-12, 9-11, 11-5 i 11-6.

E resultado aki, a bira e di 6 titulo di Kòrsou pa Dimitri Leon.

Ganando 5 di e 6 eventonan pa ranking, fásilmente Dimitri Leon a bai ku trofeo di MVP tambe.

Despues di e gran finalnan a sigui ku premiashon, unda inisialmente a duna mérito na 3 èmpayer, kende nan e último 3 añanan a kontribuí en grande ku federashon.

Napi Boekhoudt a hasi entrega di plakat na respektivamente Astrid Jansen, Nel d’Abreu de Poulo i Pel Hernandez komo muestra di gratitut.

Despues a sigui ku premiashon di tur e finalistanan, kaminda banda di trofeo nan a haña artíkulonan di pinpòn pa uso, manera tas, shirt i ‘wrist band’.