Felitciano Zschusschen i Leroy Fer ku gol

141
Felitciano Zschusschen.
WILLEMSTAD—Diferente tabata e futbolistanan di nos isla, kende tabata den akshon durante di e fin di siman ku ta tras di lomba. Esaki hungando pa nan ekipo, den kompetensianan na diferente parti di mundu. Entre esakinan, tabata Felitciano Zschusschen i tambe Leroy Fer, kende a anotá.

Gol di Felitciano Zschusschen

Felitciano Zschusschen a inisiá na banki pa Ijsselmeervogels den di 2 divishon di futbòl na Hulanda i a drenta na minüt 75 pa hunga te final. Despues di tabata apénas 1 minüt den wega, Felitciano a anotá pa duna su ekipo bentaha di 3-1, pa finalmente nan gana 4-1. Ta trata aki di ekipo, ku ta konta tambe ku futbolistanan Gillian Justiana i Shanon ‘Cheese’ Carmelia, kende ámbos a hunga kompletu.

Gol di Leroy Fer

Leroy Fer a anotá na di 27 minüt di wega pa Swansea City den Championship na Inglatera. Esaki pa duna su ekipo bentaha di 3-0, unda finalmente nan ta gana 3-2 di Brentford.

Eredivisie na Hulanda

Jurich Carolina tabata na banki i no a logra pa mira akshon ayera pa NAC di Breda, ora nan a gana Vitesse 2-1.

Tyrell Malacia a hunga kompletu i Lutsharel Geertruida tabata na banki pa Feyenoord ora nan a golia FC Emmen ku Jafar Arias, kende a drenta na minüt 69 i hunga te final 4-1.

FC Utrecht a gana di Heracles ku Brandley Kuwas hungando kompletu, ku skor di 3-1 ayera.

Vurnon Anita a hunga 90 minüt pa Willem II ora nan a pèrdè 5-1 kontra SC Heerenveen, unda Sherel Floranus a inisiá i hunga te na di 82 minüt di wega.

Elson ‘Sontje’ Hooi tabata den akshon bèk, despues di un leshon chikí. E la kuminsá i hunga 57 minüt, unda Giovanni Troupee a hunga kompletu i a haña hel faltando 1 minüt pa final pa ADO Den Haag, den wega ku no a konosé anotashon kontra De Graafschap.

Premier League na Inglatera

Den Premier League Juninho Bacuna a drenta na minüt 53 i hunga te final, unda e la haña hel den wega ku su ekipo Huddersfield Town a pèrdè 1-0 ku Arsenal.

Jurgen Locadia a hunga durante di e último 27 minütnan di wega, pa Brighton & Hove Albion, den wega ku nan a kai vensí 1-0 kontra Burnley.

Patrick van Aanholt a bandoná tereno leshoná na minüt 55 den wega di Crystal Palace, unda nan a pèrdè 3-2 kontra   West ham United.

Championship na Inglatera

Leandro Bacuna a hunga kompletu pa Reading, pero no por a evitá ku nan a pèrdè 2-0 kontra Sheffield United.

‘Cuco’ Martina tambe a hunga kompletu, ora su ekipo Stoke City a gana di Ipswich Town 2-0.

League 2 na Inglatera

Gevaro Nepomuceno a inisiá i keda remplasá faltando algu pa e pitaso final, den derota di 2-0 di su ekipo Oldham Athletic, kontra Crewe Alexandra.

Serie A na Italia

AS Roma i Justin Kluivert no a logra yega mas leu ku un empate na 2 gol kontra Cagliari, den wega ku e tabatin un asistensia. Esaki na minüt 14, pa asina su ekipo pika dilanti. Despues di inisiá e ta keda remplasá na minüt 75.

Bundesliga na Alemania

Joshua Brenet tabata na banki sin hunga opa Hoffenheim den empate na 2 gol kontra Wolfsburg.

Jetro Willems a inisiá na banki i a drenta pa hunga durante di e último 18 minütnan di wega, ora ku su ekipo Eintracht Frankfurt pèrdè 1-0 ku Hertha BSC.

First Division A na Bèlgika

Richairo Zivkovic a inisiá i hunga 86 minüt pa KV Oostende, ora nan a gana di Lokeren 1-0.

1st League na Chipre

Jarchinio Antonia a hunga durante di e promé 33 minütnan di wega pa Omonia Nicosia, den wega ku nan a gana di Alki Oroklinis 2-0.