Ministerio Públiko nunka a interogá polisnan vigiladó di Jamaloodin

Peppie Sulvaran

129
Segun Abogado Sulvaran tin yen kos robes ku a tuma lugá durante di e investigashon kontra Jamaloodin.
Punda—Segun abogado Peppie Sulvaran, mester remarká tambe ku den e temporada ei di 2012, Jamaloodin tabata minister di Finansa i komo tal tabata wòrdu protehá shete dia den siman pa dos polis. OM nunka a bai tende e polisnan aki. Pa averiguá e nivel di bèrdat di e deklarashon nan di G, defensa a kontratá un ofisina profeshonal renombrá di investigashon na Ulanda ku yama A FONDO, pa interogá e dos agentenan polisial aki na mei 2018.  Tur dos agente polisial a deklará, ku nunka nan no a mira ni Pretu, ni Nini, ni niun outo blindá den oranan di anochi den bisindario di Jamaloodin durante nan warda.

Mester konkluí ku no tin apsolutamente niun prueba ku ta sostené e historia ku Jamaloodin lo tabatin un enkuentro ku un atrakadó kaminda Jamaloodin a proponé pa mata Wiels ni tampoko no tin niun prueba pa sostené e historia di un di dos enkuentro, kaminda ku Pretu i Nini lo a bin tuma enkargo pa mata Wiels serka George Jamaloodin. Nini ku George tur dos ta ninga e enkuentronan. Pretu ku a wòrdu detené bou di sirkunstansianan mas ku dudoso, no ta na bida mas, pues no por deklará nada. E supuesto atrakadónan apesar di preshon, inklusive di hues komisario, no ta konfirmá e historia. E informante no por òrdu identifiká i tin tur indikashon ku e no ta eksistí mes. E polisnan enkargá ku vigilansia di Jamaloodin tampoko no ta konfirmá e historia. Por lo demas no tin apsolutamente niun prueba den e dosié ku e enkuentronan aki berdaderamente a tuma lugá.

Mas pió ainda ta, ku destrukshon di material di prueba krusial konsientemente òf no, ta un akto ilegal ( e relatonan di e kombersashon entre G i RST). Esaki tin komo konsekuensia ku no por wòrdu verifiká si berdaderamente e kombersashon nan aki a tuma lugá i kiko nan kontenido tabata.

Meskos ku ta e kaso ku e sms nan selektivo ku ta wòrdu usa, nos mester konkluí ku e uso di ‘testigu spiritu’ komo fuente di informashon pa por kondena hende den kaso Maximus, ta nada otro ku fabrikashon di prueba. Pa e motibu ei tambe e komunikado di prensa di Korte di Hustisia, kaminda Jamaloodin ya a wòrdu pone bou di guiotina, ta inkorekto, infundá i ta duna muestra di debilidat i prehuisio.

E komunikado di prensa dudoso aki i sin presedente di korte, ta krea tambe un problema impresindibel, pasobra kon e mes un korte aki, por deklará Jamaloodin liber di tur akusashon – lokual na nos opinion mester sosodé – sin pèrdè nan kredibilidat, despues ku nan ya a deklar’é públikamente kulpabel sin a ni sikiera mir’e òf tende su argumentonan.

Ora bo ta un pais kolonia, ku no tin niun grip riba bo mes hustisia, kosnan asina aki lo sigui sosodé. Esnan ku bo a entrega bo hustisia na dje lo sigui komportá nan mes komo e rei ku un wowo, kaminda e wowo ei ta mal skil.

Na nòmber di ekipo di defensa di Jamaloodin

Eldon ‘Peppie’ Sulvaran