Piesa nobo pa Gibi Doran graba ku ICONS BY GIO

230
Awe su piesa nobo “Danki di ta” ta kuminsá zona na diferente radio emisora.

WILLEMSTAD,—-E legendario kantante kompositor i areglista i Fundadó di agrupashon musikal GIO i Orkesta ku despues a bira GIO Fuertisimo Gilbert “Gibi” Doran, un biaha mas ta bolbe pone un piesa nobo riba merkado.

Titulo di su piesa nobo ta “Danki di ta”, ta trata aki di un komposishon di su mes i e areglo ta den man di e gran pianista areglista Renato “Nato” Mingueli. Loke ku mas a hala nos atenshon ta e echo ku Gibi a graba e piesa ku agrupashon musikal ICONS BY GIO.

T’asina ku for di awe e piesa ta kuminsá zona na diferente radio emisora lokal. E piesa nobo di Gibi ta den género di Montuno, e género musikal aki ta esun ku Gibi Doran a bira asina tantu popular den dje, for di tempu ku e tabata den agrupashon musikal Doble R SSS.

“Danki di ta” ta un piesa karga ku letra nan hopi profundo, no tin dudá ku e piesa nobo di Gibi Doran ta bai toka ku Kurason di hopi hende. Nos tin ku bisa ku despues di hopi tempu nos ta tende Gibi Doran trese un piesa ku ta bai toka ku hopi hende su Kurason, kòrda ku for di awe bo por yama na diferente radio emisora i pidi pa e piesa nobo di Gibi Doran ku su titulo ta “Danki di ta”.