Sospechoso ta skapa kastigu di prizòn

3451
Mr. Sulvaran a pleita pa e sospechoso.
WILLEMSTAD,– Korte a trata un kaso unda e hòmber F.P. tabata dilanti wes pa un kaso di droga ku tabata den su kontra.

Esaki despues ku e mester a trata na bai pòst droga na C-Post kual awor e mester para responsabel pa esaki. Tabata den luna di febrüari tras di lomba ku a bin nota ku e kaha ku e sospechoso a manda tabata kontené un kantidat di 165 gram di kokaina.

El a atmití su kulpabilidat den e kaso unda el a bisa ku el a topa e persona doño di e droga na un minimarket chines. Tur esaki despues ku ya a posponé su kaso na un okashon mirando ku e no tabata na altura di esaki i tambe su abogado mester studia e ‘dossier’. El a bisa ku el a haña un montante di 300 florin pa e trabou i si esaki lo a bai bon lo el a haña 300 florin mas.

Tambe el a trese dilanti ku nunka mas el a topa persona ku mester a dun’é e droga aki pa e bai pòst. El a bisa ku e tabata sospechá ku ta algu malu tabata den e kahanan di habon ku mester a bai Hulanda pero no tabata 100% sigur di esaki. Fiskal a pidi un kastigu di 6 luna di prizòn pa e sospechoso unda el a bisa ku 3 lo keda kologá riba su kabes ku 3 aña di prueba.

El a bisa ku nan sa ku e sospechoso no ta doño di e droga pero si bo yuda transportá droga pa un persona, bo ta un di esnan responsabel pa tur e problemanan ku tin aki na Kòrsou pa motibu di droga. E sospechoso mes a bisa ku el a hasi e kos aki pa yuda su famia pero ta lamentá hopi ku el a kometé e echo aki.

Wes a kastigá na 6 luna di prizòn kondishonal ku 3 aña di prueba miéntras tambe lo e mester traha 180 ora di trabou boluntario.