Willemstad ku nan tradishonal torneo pa sera aña

161
'Nosso Legado' ku ta ekipo di nos peloteronan profeshonal, ku lo bai defende nan titulo.
WILLEMSTAD—E ya tradishonal torneo di futbòl pa sera aña na Kòrsou, lo tuma lugá e aña aki riba djabièrnè dia 28 desèmber próksimo.

Ta trata aki di e torneo “Fair Play Cup”, ku ta keda organisá pa dirigentenan di e organisashon di Willemstad. Un ke otro riba nan propio tereno den bario di Kintjan, unda nan ekipo di e promé divishon di futbòl FFK, Inter/Willemstad tambe ta kompetí.

E torneo aki, lo konta tambe ku partisipashon di e ekipo formá pa nos peloteronan profeshonal ku tambe ta praktiká e deporte di futbòl ‘Nosso Legado’. Ta trata aki tambe di e ekipo ku ta kampion di e torneo aki, pa e último añanan.

Ku tur probabilidat, nan lo ta partisipando den defensa di nan titulo, unda ku e ekipo organisadó tambe lo kompetí. E demas ekiponan ainda no ta konfirmá, ounke ku tambe tradishonalmente sa tin un ekipo formá pa eks futbolistanan di e organisashon i tambe unu di futbolistanan yu di tera, ku lo ta riba nos isla ku vakashon, for di eksterior, unda sa tin tambe futbolistanan profeshonal den akshon.

Pues kuminsá reservá e fecha aki, unda pa último biaha pa aña 2018, lo bo por mira futbolistanan den akshon den un kompetensia riba nos isla.