Derota pa ekipo di Oldham Athletic i Gevaro Nepomuceno

152
Gevaro Nepomuceno.
INGLATERA—E ekipo di Oldham Athletic, ku ta konta ku e futbolista miembro di nos selekshon nashonal, Gevaro Nepomuceno, a sufri derota ayera. Un ke otro den partido bálido pa e playoff den EFL Trophy na Inglatera, na momentu ku nan a enfrentá e ekipo di Rochdale.

E wega a mira akshon den stadion Crown Oil Arena i a finalisá ku skor di 2-0, despues ku e promé mitar di wega a transkurí sin konosé anotashon. E mediokampista Gevaro Nepomuceno a inisiá pa su ekipo i a hunga te na momentu ku tabata falta 3 minüt pa e pitaso final, ora e mester a traha espasio pa un kompañero di ekipo, riba un kambio pa su persona.

E wega aki, tabata wega ku mester a mira akshon siman pasá, kual a keda posponé pa motibu di mal estado di tereno, debí na fuerte yobida.