Punda—Wes Sivil den Promé Instansha a dikta e kompanianan, Cura Pharmacy, Euro Pharmacy i Secure Medical, inasesibel kontra di gobièrnu pa lokual ta trata un kleim total di 7 mion florin na daño di material i pèrdida riba ganashi. E tres kompanianan a kuminsá un kaso kontra di Gobièrnu di Kòrsou i e kompania Sueko, Pharmera despues ku un lote di Viagra falsifiká a bai robes.

Na 2004 pa 2005, Cura Pharmacy a kumpra Viagra serka e kompania sueko, Pharmera. Pero Pharmera no a kumpra e Viagra dirèkt serka e distribuidor outorisá Pfizer sino serka un distribuidor ku a falsifiká e nòmber na Pakistan. E lote di Viagra falsifiká a yega Kòrsou unda despues a inisiá un investigashon penal, ouspisiá pa Hulanda. E investigashon a start despues ku Pfizer a start un investigashon riba e lote ku a yega Kòrsou. Abase di e resultadonan di e investigashon, Inspekshon di Remedi na Kòrsou a konfiska i destruí hinter e lote di Viagra. Ruba 3 di yanüari 2007 funshonarionan hudisial a drenta na Cura Pharmacy unda a konfiská e lote di viagra. Riba 2 aprel 2008, a opta pa destruí e lote. E destrukshon aki, awor a bin resultá den un disfrutá serio, unda Cura Pharmacy ta kleim riba 7 mion florin di daño na Kòrsou i Pharmera.

Cura Pharmacy entretantu na 2008 a sera nan porta nan, pero na mei 2015 nan a manda kobra e daño okashoná pa lokual a sosodé na Kòrsou despues ku nan a importá Viagra falsifiká. Entretantu na Hulanda a pèrsigui e hòmber doño di Cura Pharmacy Janssen. Riba 27 di novèmber 2015, e la keda liberá di algun akusashon pero a risibí kastigu pa importashon di nòmber falsifiká di remedi. Awor ku e kosnan ta tras di lomba, Cura Pharmacy  skohe pasio sivil pa vengansa hurídiko. Nan ta kleim ku Kòrsou a aktua robes dor di destruí e lote di Viagra pasobra nan no a kibra ku Lei di Remedi na Kòrsou. Den e lote tabatin remedinan outéntiko ku a laga destruí tambe, segun Cura Pharmacy. Tambe nan ta kleim e kompania Sueko, Pharmera dor di a entrega remedi falsifiká. Pa tal kaso, Cura Pharmacy a demanda den korte sivil pa Kòrsou i Pharmera paga nan e suma di 856 mil dòler estado unidense i 2.65 mion Euro ku ta alrededor di 7 mion florin antiano.

Pero Korte sivil, den práktikamente tur demanda kontra di Gobièrnu di Kòrsou, a deklará Cura Pharmacy inasesibel. Esaki a duna abogado di gobièrnu mr. Wilfred Flocker rason despues ku e la alegá ku e petishon di Cura Pharmacy a kaduká pasobra 5 aña a pasa dia bieu miéntras hasta e lote a keda destruí mas di 9 aña pasá. E tratamentu kontra di Pharmera si ta sigui otro aña na yanüari.