‘ESPN Latin’ ku kobertura di algun deportista arubano

175
Parti di filmashonnan ku a tuma lugá na Aruba.
ARUBA—E kadena di televishon ESPN ta mundialmente konosí pa transmití programanan relatá ku deporte riba kanal di televishon i retnan sosial. Pa e region Latino Amérika esaki ta yamá ‘ESPN Latin’ i ta transmití na e idioma spañó.

Riba inisiativa i bou di guia di Aruba Tourism Authority e sekshon di “ESPN – Women Latina America”, a bishita Aruba, pa kubri bida di kuater atleta lokal, kende a sa di kapta atenshon internashonal ku nan logronan grandi den deporte.

E deportistanan aki, ta konta nan historia di perseveransia i determinashon. Ademas, ESPN ta mustra e bida diario di kada un di nan, kon e ta pa biba ku e deporte, nan training i kiko e ta pa ta un hende muhé den deporte en general i e sakrifisio pa nan biba komo atletanan mundial den e prestashonnan tòp di nan deporte.

Ta trata aki di e deportistanan Kayla Arends i Mali Rafini konosí pa nan partisipashon i tambe logronan importante den ‘Beach Volleyball’.

E aña aki e ekipo Arends-Rafini a partisipá den e weganan, e asina yamá ‘Youth Olympic Games’ na Buenos Aires–Argentina.

Tambe nan a sigui bida di Sarah-Quita Offringa, un windsurfer profeshonal konosí pa ta den e tòp globalmente ku a logra 14 biaha pa ta e kampeon mundial den Freestyle i Slalom.

Tambe a pone atenshon na e atleta Monica Pimentel, ku su logronan den e mundu di Taekwondo, unda el a bai representá Aruba na e weganan Olímpiko na Rio de Janeiro, Brazil na 2016.

Pa algun dia, ESPN a sigui bida di e kuater atletanan di Aruba aki, di serka, pa duna un bista kon nan deporte ta kombiná ku nan bida diario.

Ademas, e ekipo di ESPN a haña e oportunidat di sera konosí i graba vários otro atrakshonnan ku nos destinashon ta brinda na e bishitantenan.

‘ESPN Woman’ ta enfoká riba hende muhé remarkabel den e mundu deportivo ku un ángulo riba inovashon i inspirashon, kual ta wòrdu transmití den mas ku 12 pais Latino Americano, ku un oudiensia averahe di 20 mion televidente.

Kada programa ta wòrdu ripití 2 biaha pa dia durante hinter un siman. Tambe esaki lo wòrdu transmití den e merkado di ESPN Norte Amérika.

‘Aruba Tourism Authority’ ta hasi su esfuerso kontinuamente pa mehorá nan industria turístiko i ta hasi esaki posibel pa medio di strategia i métodonan inovativo i mas aktual.

Ta buska diferente ángulo pa asina nos destinashon ta keda ‘top of mind’ di e bishitante. E transmishon na ESPN ta duna un oportunidat úniko pa promove e atletanan arubano profeshonal i naturalmente esaki ta un posibilidat bunita pa Aruba sigui haña kobertura amplio komo destinashon turístiko.

A.T.A. kier a gradisí tur esnan ku a kontribuí na e produkshon aki i spesialmente e atletanan pa pone nan tempu disponibel pa esaki.