Eugene Cleopa: Gobièrnu sa kaba ku mi ta kontra lei di apoderashon

535
Si nos ta den polítika, nos tin ku atendé ku reglanan ku tin den polítika, no reglanan di beisbòl, futbòl òf karate”, asina Cleopa a bisa.
Willemstad,– Parlamentario pa partido MAN, señor Eugene Cleopa a splika ku e no ta di akuerdo ku e lei di apoderashon  ni maske kua nòmber ku nan duna e lei aki. “Mi lo no ta di akuerdo ku e lei aki ni maske ki nòmber nan dun’é”, asina señor Cleopa a bisa.

E parlamentario ta splika ku no ta paso Kenneth Gijsbertha ta di mesun partido kuné e ta bai di akuerdo kuné. “E kos aki no tin nada di haber ku e trabou ku ami a bin ta desplegá komo parlamentario i for di awor gobièrnu sa kaba ku ami no ta bai pone mi posishon di parlamentario pa bini ku niun lei di apoderashon”, asina e gai di tur ora a sigui bisa.

E ta bisa ku si gobièrnu tin lei pa pasa rápido, nan mester bini ku nan den parlamento i pa trata nan ku urgensia den parlamento, pero no pa kita derecho di parlamento pa trata lei.

Mas aleu e ta sigui bisa ku loke si ta bai wak ta e asuntu di red tape, kaminda prosesonan ta dura muchu, pero esaki ta un asuntu di gobièrnu, segun Eugene Cleopa.