GM di Kwartier ta man na kabes: Masha hopi petishon pa rumannan Boeldak

183
Sander ta un èks profeshonal ku ta hunga den outfield i ta karga un bon bate huntu tambe ku un bon spit.

Willemstad,– Despues ku e rumannan Sander i Rogier Boeldak a hunga un tremendo torneo aya na Santo Domingo pa e selekshon di Kòrsou, ta masha hopi yamada mes a drecha serka e dos hóbennan aki ku a hunga semper pa organisashon di Groot Kwartier.

Segun informashonnan ku Vigilante a risibí ekiponan manera Wild Cats, Scorpions i Santa Rosa sigur ta entre e ekiponan ku a laga sa ku nan ta interesá den e dos hóben peloteronan aki.

Echo ta ku e hóbennan aki no ta liber i lo no ta probabel tampoko ku Kwartier lo laga nan liber sin nada a kambio.

E ekipo di Kwartier a pèrdè kaba sigur dos picher ku tabata liber i por spera ku si nan disidí di laga e ruman nan Boeldak liber, ku nan lo bai pidi algu a kambio i esaki lo por ta picher.

E dos ruman nan aki sigur ta bai riba merkado, mirando ku tur dos a bati riba 300 òf serka di 300 den temporada regular i riba 400 den e torneo ku a tuma lugá na Santo Domingo.

Rogier ta un primera base ku bon wante i bon bate, miéntras ku Sander ta un èks profeshonal ku ta hunga den outfield i ta karga un bon bate huntu tambe ku un bon spit.

Segun un fuente a konta Vigilante, e GM di Kwartier kende ta Lando Chirino ta man na kabes i a bisa kaba ku esunnan ku kier e rumannan Boeldak, lo mester bini punda i kumpli ku lokual Kwartier ta pidi. Pues aparentemente Chirino a bisa kaba ku niun hende no pensa mes ku ta laga e dos muchanan aki liber sin nada a kambio.