Jonathan Willems ku desayuno pa muchanan di Kolegio Cola Debrot

140
Jonathan Willems.
WILLEMSTAD—Djaluna próksimo, e hóben prospekto pelotero YDK, Jonathan Willems, lo bai hasi un bunita gesto ku skol di fundeshi Cola Debrot situá na Noord Roozendaal.

Jonathan Willems for di aña 2015 a firma komo agente liber i ta pertenesé na e organisashon di Cincinatti Reds Greeneville. Despues ku temporada 2018, a bai hopi bon pa Jonathan, e ta na Kòrsou pa gosa di un vakashon bon meresí.

Semper ku Jonathan ta na Kòrsou, e kier duna komunidat algu bèk. Den kuadro di esaki, Jonathan, a skohé pa djaluna benidero, dia 17 desèmber 2018, e bai ku un regalo hopi spesial na skol di Fundeshi Cola Debrot.

Esaki ta e skol ku Jonathan mes a bishitá komo mucha i a inisiá ku su karera di edukashon na dje.

Djaluna, Jonathan lo bai ta na e skol aki, i lo entregá un desayuno na tur e 65 muchanan ku ta parti di gruponan 1 i 2, ku ta bishitá e skol di fundeshi aki.