Nievine Villarreal kantante di e banda nobo Reinan di kaya

198
Tene hopi kuenta ku e kantante aki den front di e banda nobo “Reinan di kaya”.

WILLEMSTAD,—-Ora ku bo a kere ku kos nan a kaba, pa loke ta trata moveshon den nos farándula, wèl mi por bisabu den tur trankilidat ku esei no ta e kaso. Di informashon ku a drenta na mesa di redakshon di ‘E Mulina’, ta bisa ku e agrupashon musikal ku dia 4 di yanüari 2019 ta bai hasi nan debut ofisial den nos farándula ku ta e banda nobo “Reinan di kaya”, tin un kantante femenino den nan front.

Ta trata aki di e kantante Nievine Villarreal ku no ta un kantante deskonosí den nos farándula. Esaki ta nifiká ku awor e front ta forma pa Payo Ducan, Herbert Jacobus, Tiko Varielles i nan kantante nobo ku ta Nievine Villarreal.

Tambe nos tin informashon ku pa otro siman, e agrupashon musikal nobo den ámbito d Kòmbèk “Reinan di Kaya” su disko kompakto ta riba merkado. Ta trata aki di un CD ku tin un total di 6 piesa nobo ariba. T’asina ku ayera nos tabatin e honor di por a skucha nèt dos piesa di e banda nobo, nos tin ku bisa ku e banda ta zona manera un banda ku tin hopi aña aktivo den nos farándula.

Tambe nos tin informashon ku e agrupashon musikal “Reinan di Kaya” a kuminsá move den nos farándula, pero den fiesta nan priva, siman pasa mes nan tabata den kombinashon ku Zudup Hopi Forsa. Pero manera ku nos a bisa parti ariba den e artíkulo ku djabièrnè 4 di yanüari e banda nobo ta hasi nan debut ofisial den nos farándula.