Partinan di un raket lansado deskubrí den bahia di Asuncion

Na Banda Bou

606
Willemstad—- Na e promé instante hopi a kere ku ta un hala di avion pa despues di a studia e partinan ku a bin topa kuné den e bahia di boka Asuncion a bin saka afó ku aki ta trata d partinan di un raket lansado ku ta ser usa pa lansa satélite pa bai den órbita.

Ayera den oranan di atardi un personal di vigilansha ku ta patruya den aria di e playanan na Banda Bou na altura di Boka Asuncion òf e asina yama plèstik Baai mester a tuma nota di algun opheto straño den laman kantu di baranka. Mesora e la alarma Polis ku e pensamentu ku aki por ta trata di partinan di un avion ku por a kai den laman i a drif drenta e boka di e playa. Mesora outoridatnan a presentá i huntu ku e tim forensiko a hasi e investigashonnan nesesario riba e partinan ku a bin topa kuné. Por a mira ku tabatin algun lèter kolo blou riba e partinan kual por a bira mas fásil pa esaki wòrdu identifiká. A laga konfiská esaki bai kuné pa asina por a hasi mas investigashon.  For di investigashon ku Vigilante a hasi pero ku no a keda konfirmá di parti di e departamentu di aviashon a saka afó ku aki ta trata di partinan di un raket lansado ku ta ser usa na momento ku tin ku manda un satélite den órbita pa asina por hasi kualke investigashon.

E partinan ku a ser haña ta pertenesé na ESA ku ta Europian Space Agency  ku tin un base na e Guyana Franses. Einan tin un base unda regularmente sa lansa rakètnan pa bai den órbita. A bin resultá ku esaki ta parti di un Metop C ku a ser lansa dia 7 di novèmber último for di e base na French Guyana. Ta trata di un satélite pa midi wer ku a ser lansa for di e base ei.  Metop C asina e satélite ta ser yama ta e último ku a ser lansa for di e  aña 2006 i 2012 unda a lansa e otronan ku tabata karga e nòmber Metop A i tambe Metop B. e satélite aki ta wòrdu usa pa asina por opservá e parti atmosfériko, pa wak e temperatura húmedo, gas, ozone i tambe pa midi e bientu riba oséano . Ta trata di un satélite ku tin un peso di 4038 kilo. Ku esaki kier trese un klarifikashon ku no ta trata di parti di un avion pero si parti di un raket esta un rocket launcher  ku ta ser usa pa transportá un satélite. Sigur den e dianan ekspertonan di e base na Guyana lo por bin hasi un bishita na Kòrsou pa asina hasi investigashon na parti di nan makinaria ku a keda tras ora ku esaki parti na pida ora e satélite ta bai laira.