Sindikato kier 4 dia di skol pa yuda skarsedat maestronan

133
skarsedat di 4000 maestro
AMSTERDAM—Si ta keda na sindikato, muchanan di skolnan básiko lo bai skol 4 biaha pa siman komo medida kontra skarsedat kresiente di maestronan.

E di 5 dia ta akomodá e muchanan pero no ta haña les. Esaki ta un medida di emergensia segun president di e sindikato den Enseñansa AOb, Liesbeth Verheggen. E skarsedat di maestronan na skolnan basiko t’asina serio ku obligatoriamente skolnan ta dividí klasnan òf ta pone asistente ku no a kaba su estudio ainda. Pa ministernan di Enseñansa Arie Slob i Ingrid van Engelshoven skolnan por pone personanan ku no a kaba estudio dilanti klas. Pero esaki no ta solushoná nada segun Verheggen. Esaki no ta enseñansa sino krèsh. Pone esnan inkompetente strukturalmente dilanti klas no ta solushoná e problema. Mayornan ta kere ku nan yunan ta haña enseñansa pero no t’asina. Ministerio di Enseñansa ta kalkulá e skarsedat na 4000 maestro i den 2027 na 11.000. gabinete no kier invertí mas di loke el a hasi kaba. Nan ta aseptá ku e problema ta keda. E úniko solushon segun Verheggen ta mas invershon. E fluho di maestronan ku ta sali di skol ta krese pero ta dura 4 aña pa entrená maestronan nobo. E problema lo dura algun aña mas.