Fortuna/Kurá Piedra ta sigui invikto

109
Hubentut Fortuna.
WILLEMSTAD—Segundo divishon di futbòl FFK a kontinuá ayera nochi na Brievengat. Un ke otro riba tereno di FFK, na momentu ku e ekiponan di Fortuna/Kura Piedra i Indekor a enfrentá otro.

E wega aki, ku tabata e último pa aña 2018 den segundo divishon, a finalisá den triunfo pa e muchanan di bario di ‘Seru’ i bisindario, dirigí pa David Heykoop.

Tabata wega ku a tèrminá ku skor di 2-1. Un outogol di Eugene Ferrero i otro gol di Genaro Baars, faltando 4 minüt pa e pitaso final, tabata esnan ku a sòru pa e golnan di e ekipo ganadó, pa asina nan bai kas ku e 3 puntonan ku tabatin disponibel pa e wega.

Miéntras ku Adrian Freitas, tabata esun ku a anotá e gol ku a salba honor pa e ekipo pèrdèdó den e wega di ayera, ku ta Indekor.

Ku e resultado aki, e ekipo di Fortuna/Kura Piedra ta sigui invikto i awor tin 9 punto for di 5 wega, ku ta produkto di 3 empate i 2 triunfo.

Indekor ta keda ku 7 punto, despues ku nan tambe a hunga 5 wega.