Futuro di Riechedly Bazoer no ta konosí

264
Riechedly Bazoer.
PORTUGAL—Kosnan ta pinta malu pa e hóben mediokampista Riechedly Bazoer. Esaki despues ku dirigentenan di e ekipo di FC Porto, no ta interesá mas pa keda kuné, miéntras ku esnan di VfL Wolfsburg, a splika di tampoko tin interes mas den dje, despues ku e la keda di hür pa Porto.

Na final di novèmber último, Bazoer a yega lat, unda a tuma medida disiplinario i tin rumornan insistente ku pronto lo e por ta di regreso pa Alemania, despues ku a bira konosí ku e no ta bon biní mas serka e ekipo portugues.

Riba esaki for di Alemania, a drenta e informashon, ku sigur nan lo no ta sperando riba dje, kual mesora a lanta e pregunta riba su posibel futuro.

Tabata na yanüari 2017, ku Bazoer a pasa pa Wolfsburg, despues di tabata na Hulanda ku Ajax, unda a paga 11.9 mion Euro pa e kambio. Pa motibu di no ta hopi den akshon, e la keda kambiá for di Bundesliga pa Portugal, unda ainda e no a hunga durante di e kampionato i awor a keda pone un banda.