Raoul Alias kampeon invikto di Dam Individual 2018

116
Raoul Alias.
WILLEMSTAD—E maestro di dam, Raoul Alias, a titulá kampeon di dam 2018. Esaki despues di a finalisá e kampeonato ku 17 punto for di 11 wega.

Despues di e di 10 buèlta Carlos Lorevil i Raoul Alias tabata komandá e tabla di posishon, empatá ku 16 punto, kada unu. Den e último buèlta di e kampeonato, riba e último fecha tambe di e evento, sopresivamente Carlos a sufri un derota kontra di Edgar Gibbs, miéntras ku Raoul a empatá su wega kontra di Silvio Blijden. E resultadonan aki, a pone ku Alias a bai ku e titulo ku 1 punto di diferensia riba Lorevil.

E final di e kampeonato a konsistí di 12 hungadó ku 11 buèlta, unda tur  hungadó a enfrentá otro i tabatin bastante wega, hopi interesante ku a tuma lugá.

Raoul Alias a titulá kampeon invikto, komo úniko hungadó ku no a pèrdè ningun wega den e kampeonato 2018. Esnan ku a sigui, den e promé 5 nan ta Carlos Lorevil, Mijail Eisden, Siegfried Panneflek i Clifton Agatha, kende nan lo representá Kòrsou otro aña den kompetensia ABC na Aruba i ta pendiente pa representá Kòrsou tambe den e kampionato pa ekipo otro aña.

Deporte Vigilante ta felisitá Alias ku su titulo.