Andy Martina no ta kontentu kon Lipo a trata kuné: Kwartier a kita mènedjer i 8 hungadó for di Santa Rosa klase A

130
Direktiva di Kwartier pa 2019 ta kla i ya nan a kuminsá move, buskando hungado pa tur divishon
Willemstad,–“ E por ta bon, e por ta malu” ta loke ku un dirigente di Kwartier a splika na Vigilante den fin di siman.

El a bisa nos ku e ta referí akinan na e echo ku Kwartier a logra haña e mènedjer di Santa Rosa klase A pa manehá e ekipo di Kwartier den Klase A, pero huntu kuné el a bini ku 8 hungadó ku tabata hunga den klase A di Santa Rosa. E dirigente aki a splika nos ku mester tene kuenta ku Kwartier tabatin kaba un ekipo den Klase A ku porsierto a pèrdè dos wega pa forfeit i awor lo mester inskribí di nobo pa hunga den klase A.

Pero den mesun rosea e ta splika ku ora un ekipo pèrdè dos wega pa defoult i kai afó, ta nifiká ku tur hungadó ta bira liber i por bai kaminda ku nan ke i pues tòg tin e parti bon ku a logra haña e ocho hungadónan di Santa Rosa ku a bini ku nan mènedjer. Mester bisa mesora ku e 8 hungadónan aki tur tabata liber i awor e doló lo ta sintá serka Santa Rosa kendenan lo mester bai wak kon nan ta bai forma na klase A, ounke mester bisa ku nan tin un hubenil fuerte di kual nan lo por hasi uso di seis hungadó. Tambe Vigilante a komprondé ku e mènedjer nobo di klase A kende ta señor Andy Martina lo a ekspresá su desgustu i mal kontentu pa ku e ekipo di Santa Rosa klase A pa e echo ku apesar di tur esfuerso i bon resultado den klase A, nunka e dirigente máksimo di e organisashon a sinta den un reunion kuné pa sa sikiera kon kos ta bayendo, pues el a opta e ora ei pa djòin Kwartier i huntu kuné 8 hungadó ku ta liber.