Kwartier negoshando mega dil ku Wild Cats

144
Sander Boeldak ta hunga outfielder i tin basta interes pa su servisio.
Willemstad,– Siman ta habri ku un notisia ku sigur lo kue hopi hende di sorpresa i kisas hasta esnan ku ta pertenesé na e dos ekiponan ku ta Kwartier i Wild Cats.

Informashon djaden ku a yega serka Vigilante ta mustra ku e ekipo di Kwartier sea ta deseá òf ya a kuminsá ku negosiashonnan ku e ekipo di Wild Cats despues ku e ekipo di Wild Cats lo mester a mustra sierto interes den e dos rumannan Rogier Boeldak kende t hunga primera base i Sander Boeldak kende ta hunga outfield.

E dos rumannan aki no ta liber i for di trempan Kwartier a bisa ku nan lo no laga e peloteronan aki bai sin risibí nada a kambio. Ta konosí ku den beisbòl na Kòrsou, dilnan a yega di ser hasi pa kambio di hungadó, pero semper e kos tabata bai ketu ketu style di forma skondí, pero ku yega di e GM di Kwartier den e mundu di beisbòl “AA:”, kos ya ta kambiando, mirando ku e dil aki ta papia tur kaminda, esta pues ku Kwartier a bisa di lo no laga hungadó ku no ta liber bai sin risibí nada a kambio.

Vigilante tin informashon konfirmá ku sigur e ekiponan Scorpions, Wild Cats i Marchena a mustra interes den e rumannan Boeldak. Pero aparentemente Scorpions no tin masha kos pa ofresé a kambio, mirando ku Kwartier sigur lo kier picher den e kambio aki.

Pa loke ta Marchena, Kwartier a pidi Risando Pastor, Rehan Fecuna, i Ferreria i Liberia i pues akinan mesora Marchena a kontesta pa legumai.

A sobra e ekipo di Wild Cats ku kende Kwartier ainda lo mester ta papiando, pa loke ta Wild Cats pues nan ta deseá e dos rumannan Boeldak di Kwartier, pero Kwartier ta deseá e dos ohochinan Henrietta, mas Isachar Perreira i tambe Arjun Huerta. Pues te ainda ta esaki ta e úniko opshon ku ainda ta na bida, pa loke Kwartier ta pidi a kambio di e dos rumannan Boeldak.

Wild Cats lo mester a duna di konosé ku nan ta studiando e dil aki i ku pa e siman aki lo bira konosí si e dil ta bai On òf e ta bai Off. Naturalmente mirando ku nos ta hungando un baseball ku supuestamente ta amatùr, pues bo no por kambia e hungadó di tim si e no ta deseá i aki tambe mester wak si e hungadónan enbolbí den e dil aki ta dispuesto na bai e timnan ku ta papiando di dje aki.