Pa Kòrsou di Fundashon Publikashon dediká na Patriotismo

105
Kòrsou bo ta grandi di bèrdat.

WILLEMSTAD,—-Djadumingu 9 di desèmber 2018 tras di lomba, Fundashon Publikashon a tene su anochi literario titulá ‘Poesia pa Kòrsou’ den ‘Teatro Norman de Palm’, ántes ‘Teatro Luna Blou’, na Otrobanda. Fundashon Publikashon a organisá e anochi akí pa rekoudá fondo pa su aktividatnan den futuro.

Den 2019 Fundashon Publikashon ke bin ku un publikashon di buki di poesia kompañá pa material oudiovisual. Durante e anochi akí, tres generashon di poeta a trese un kolekshon variá di poesia ku e tema patriotismo. Kada poeta, na su propio estilo, a tira lus riba e manera kon e ta mira amor pa patria Kòrsou, kon nos komo Yu di Kòrsou ta anda ku nos mes i  kon nos ta anda ku Kòrsou en general.

E promé generashon tabata konsistí di poeta hóben te 30 aña di edat, e di dos generashon di poeta entre 30 i 60 aña i e di tres generashon di  poeta di 60 aña bai ariba, a interkalá e programa di poesia ku baile di Rudsel D’Antonia i kanto di Dibo Doran ku tambe a reflehá Kòrsou i e tema patriotismo. Kada generashon di poeta a revelá kon nan ta pensa i ta sinti ‘Patriotismo’, kual nan a ekspresá segun nan propio estilo di deklamá i presentá nan poema. E poetanan a divulgá nan sintimentu patriotíko sea pa medio di nan propio komposishon òf pa medio di komposishon di otro poeta.

Riba esenario un elenco di poeta manera Hebron Jansen, Rudsel van Lamoen, Maria Diwan, Silviene Martina, Nydia Hato Arvelo, Rashid Felida, Myrurgia Mutueel, Randiyon Eleonora, Eligio ‘Boy’ Koeyers, Philip Fifi Rademaker, Crisen Schorea i Gibi Bacilio, a trese dilanti kiko patriotismo ta nifiká pa nan. Algun di e poetanan a trese nan poema nan so. Algun a presentá ku kompañamentu musikal di diferente instrumento di muzik, manera tambú i fió.  Otro a usa e kalor di un grupo pa presentá nan poesia, manera Grupo di Poesia Abayomi i Grupo Ankrá na otro.