RST fo’i 2010 a sigui oumentá poder

892
Zeelandia– For di 2010 , tur gobièrnu ku a sinta, tabata duna RST hopi mas privilegio. Aktualmente  e unidat di RST ta disfrutando di tur benefisio fisíko i siguridat na Zeelandia, miéntras na Garipitoweg no tin niun klase di vigilansha adekuá pa e reshèrshinan .

Un artíkulo den un korant ulandes lanta pániko serka polítikonan na Den Haag, kende a bisa ku “RST mester garantisá estado di derechi den Reino Ulandes”. Esaki ta prueba ku RST pa Den Haag, ta nan instrumento pa kontrolá estado di derechi i no un proyekto pa duna asistensha na tékniko na Kuerpo di Polis. Den práktika, RST ta ofendé, balotá i deskriminá demas reshèrshinan.  Por ehèmpel, na RST e ulandesnan no ta interogá niun sospechoso peligroso den nan edifisio na Zeelandia. Nan ta bini den kantor di Garipitoweg pa hasi esei i despues ta baha bai laga e warda. Na Zeelandia e reshèrshinan ta traha den tur fasilidat, kontrali na Garipitoweg. Por ehèmpel, vehíkulo di trabou. Outo di servisio ta daña na Garipito, mientras reshèrshinan di RST ta kore rònt den tur sorto di outo outo nobo of ta hür outo pa nan. Un otro sla duru, ta por ehèmpel a saka opservashon tèkniko i pone den man di RST. Esaki ta un sla fuerte bou di faha, unda e ulandesnan den RST a haña poder kompleto pa opservá i duna “instrukshon” dirèkt na reshèrshinan yunan di Kòrsou.

Awor ku Kuerpo di Polis a pèrdè kòntròl riba e funshon di opservashon, funshonarionan ulandes den RST tin maneho “ken si i ken no por opservá”. Esaki ta un peliger serio debí ku ta RST awor tin poder riba e tarea di opservashon pa Kuerpo di Polis. Ta konosí, ku hefe di polis ni tampoko minister di hustisia no tin kòntròl riba RST ni tampoko TBO. E unidat mas importante den Kuerpo di Polis ta esun di OT. OT ta para pa Observatie Team, Tim di Opservashon. E unidat ta unu di esnan mas importante pa lokual ta trata operashon di opservashon.

Téknikamente ta nifiká ku minister a entrega un poder serio na RST unda tur hende sa ku den RST ni minister ni hefe di kuerpo di polis no tin ningun klase di kontròl. Traspaso di OT pa e unidat di RST, no solamente ta problemátiko, sino tambe e ulandesnan oropeo den RST, por uza e tarea ehersé kòntròl riba nos ministernan i parlamentarionan. Di ta forma awor esaki ta konfirmá despues ku Den Haag a bisa ku RST ta un instrumento pa mantené estado di derechi na e.o. Kòrsou. Ta konfirmá tambe funshonarionan ulandes oropeo di RST ta sinta tambe den ofisina di Representashon Ulandes unda nan ta kordiná tarea ku eks koleganan di RST ku ta trahando den servisio di representashon ulandes.