Thallysa Jano yu di Luwi Jano ta hasi su debut den Tumba 49

299
E ta hasi su debut otro aña den Tumba 49.

WILLEMSTAD,—-Festival di Tumba 2019 sin duda lo bai bira un festival kaminda ku historia lo bai ser pone. ‘E Mulina’, a haña informashon ku Thallysa Jano ku ta yu muhé di tres biaha Rei di Tumba Urvin “Luwi” Jano ta bai hasi su debut den Festival di Tumba 2019.

Historia ta mustra ku esaki no ta e promé biaha ku un tata Rei di Tumba i yu ta partisipá den Festival di Tumba den mes un aña, pero loke si ta hasi historia ta e echo ku ta pa promé biaha bo ta bai haña un Tata i yu muhé ta partisipá den Festival di Tumba. Den pasado pa ta eksakto den dékada 80 esaki a pasa, na aña 1981 tabata pa promé biaha ku esaki a pasa den Stadion di S.U.B.T, na momentu ku Boy Dap i su yu Anralice Dap a partisipá den festival di Tumba, loke si ku ta hasi esaki apart ta e echo ku nan dos a partisipá ku e mes un agrupashon musikal, ta trata aki di agrupashon musikal Explosion Latina, e tempu ei Boy Dap a keda Korona komo Rei di Tumba i Anralice a kanta e Tumba Herebé, un Tumba ku a dal duru den Stadion di S.U.B.T. na aña 1981.

Na aña 1987 a toka turno pa dft Edwin Thomasa i su yu Edwin Thomasa Jr. Nos tin ku bisa ku kada un kantante a bai ku diferente banda. Pa loke ta trata Edwin Thomasa tata, e la bai ku agrupashon musikal Estrellas Del Caribe, e aña ei Edwin Tata a kanta e Tumba “Ata mi ku brasa abri”, miéntras ku su yu Edwin Thomasa Jr, a bai ku agrupashon musikal Pavo Win i Billoneros, e la kanta e komposishon “Asepte” ku ta un Tumba ku tambe a dal hopi duru den Stadion di S.U.B.T., loke ku tambe nos mester pone aserka ta ku Famia Thomasa ta e úniko Famia ku dos generashon a partisipá den Festival di Tumba, esaki nan ta Edwin Thomasa Jr i Quintony “Tsean” Thomasa ku a hasi su debut na aña 2006 kaminda ku e la bira e promé finalista di mas yòn di Festival di Tumba te na e momentu nan aki.

2019 sigur lo bai bira un aña di historia na momentu ku Thallysa Jano ku ta yu muhé di tres biaha Rei di Tumba Urvin “Luwi” Jano hasi su debut den Festival di Tumba, i den mes un aña su Tata Rei di Tumba 2018 Urvin “Luwi”Jano tambe ta partisipá den defensa di su Korona, e úniko diferensia ta ku Thallysa Jano ta bai ku agrupashon musikal G-Spot i su Tata Luwi Jano ta bai ku Buleria. Pues despues ku famia Dap i Thomasa hasi esaki den dékada 80, awor despues di tres dékada, 32 aña tras di lomba ta toka turno na famia Jano. Kaminda ku tres Rei di Tumba ta partisipá den mes un aña ku nan yu, esaki sin duda ta un bunita historia,ku tambe lo bai paresé den e Buki di Historia di Festival di Tumba ku lo ta kla na selebrashon di 50 aña Festival di Tumba na aña 2021 ku Poder di Dios.