Algun wega interesante pa sera aña den vòlibòl

124
Akshon den wega di volibol.

 

WILLEMSTAD—E kampionato di vòlibòl dediká na Dito Ravenstein a kontinuá ayera den sala Errol Rooi, ku e último weganan di e kampionato aki, pa loke ta aña 2018.

Den klase A femenino, Watakeli a lucha fuerte kontra Hurricane den un wega ku a bai tres sèt, pero Hurricane ta sali di porta grandi ku parsialnan di 25-23, 25-27 i 16-14. Tur e sètnan a kaba ku e diferensia mínimo.

Den maskulino A, Watakeli no tabatin problema pa derotá Titus 2-0, (25-17 i 25-23).

E ekipo di Warwarú tambe tabatin un anochi fásil ayera, ora ku nan a logra na superá Green Tigers 2-0, ku sètnan ku a finalisá ku skor di 25-14 i 25-8.

Xaverianen si a keda kòrtiku ayera kontra Stakamahakchi, na momentu ku e ekipo di Staka logra pa gana 2-0, 25-17 i 25-13.

Den e wega di klase superior femenino, Stakamahakchi ta mantené su invikto, ora ku nan a dominá Hurricane, ganando ku skor di 3-1, 25-20, 22-25, 25-12 i 25-17.

E wega aki tabata di un nivel haltu, i tabata e último wega pa e aña 2018.

E kampionato ta reanudá na luna di yanüari 2019. Fevoko ta deseá tur hende felis dianan di fiesta.