Gillian Justiana i Felitciano Zschusschen ku gol

127
Gillian Justiana.
WILLEMSTAD—Durante i e fin di siman ku ta tras di lomba, un biaha mas nos futbolistanan ku ta militá den eksterior tabata den akshon. Un ke otro na diferente parti di mundu, ku nan respektivo ekiponan.

Justiana i Zschusschen ku gol…

Entre esakinan tabatin Gillian Justiana i Felitciano Zschusschen ku a anotá. Ámbos den wega di Ijsselmeervogels, den di 2 divishon na Hulanda. Huntu ku Shanon ‘Cheese’ Carmelia, nan a forma e trio ku a hunga kompletu pa yuda nan ekipo gana di Rijnburgse Boys. Zschusschen a hasi e pase pa Justiana anotá 1-0 na minüt 48, pa seguidamente Zschusschen mes oumentá na 2-0, na minüt 51, unda finalmente nan ta gana 4-1.

Gevaro Nepomuceno ku 3 asistensia…

Miéntras ku e mediokampista di nos selekshon nashonal di futbòl, Gevaro Nepomuceno, tabatin 3 diferente asistensia den wega ku su ekipo Oldham Athletic a gana 4-2 di Bury den League 2 di futbòl na Inglatera.

Gevaro su asistensianan tabata na minüt 10, pa su ekipo kue bentaha 1-o. Minüt 31 pa wega bira 2-0 i na minüt 62, pa seya e triunfo i pone e skor final na 4-2. Gevaro a inisiá i a wòrdu remplasá na minüt 90 di wega, ku a alkansá sosiegu 3-0.

Justin Kluivert ku 1 gol i 1 asistensia

Justin Kluivert a anotá na minüt 45 pa AS Roma empatá na 2 gol ku Genoa den Serie A na Italia, pa seguidamente hasi e pase di e gol ganadó, ora nan a bai ariba 3-2 na minüt 59 i finalmente a gana 3-2.

Denzel Dumfries ku gol den goliada riba Kuwas…

E arubano Denzel Dumfries, hungando kompletu riba ala drechi den defensa pa PSV, a anotá na minüt 79, pa pone e skor 3-0, unda finalmente nan ta gana di Heracles, ku a konta ku Bradley Kuwas, kende a hunga kompletu, 4-0. Kiper Eloy Room tabata na banki pa PSV den e wega aki.

Premier League na Inglatera

Patrick van Aanholt a hunga 90 minüt pa Crystal Palace den wega ku nan a gana Leicester City 1-0.

Juniho Bacuna tambe a hunga kompletu pa Huddersfield Town, den wega ku nan a pèrdè 1-0 kontra Newcastle United.

Jurgen Locadia a drenta pa hunga durante di e último 6 minütnan di wega pa Brighton & Hove Albion, den wega ku nan a pèrdè 2-1 kontra FC Chelsea.

Championship na Inglatera

‘Cuco’ Martina a hunga 90 minüt pa Stoke City, unda nan a logra 1 punto, empatando na 2 gol ku Aston Villa.

Leandro Bacuna tambe a hunga 90 minüt pa Reading i a logra tambe 1 punto. Esaki den empate di 1 gol kontra Rotherham United.

Eredivisie na Hulanda

Jurich Carolina, kende ta parti di nos selekshon tabata na banki i no a hunga pa NAC, den wega ku nan tambe a logra 1 punto, empatando sin gol kontra PEC di Zwolle.

Ricardo van Rhijn tambe tabata komo suplente i no a logra pa hunga pa AZ den wega ku nan a logra triunfo 2-1 riba Excelsior.

Sherel Floranus a hunga kompletu pa Heerenveen, unda nan mester a konformá ku derota di 3-2 na man di FC Utrecht.

Jafar Arias a inisiá i hunga 75 minüt pa FC Emmen, den wega ku nan a logra 3 punto, derotando FC Groningen 2-1.

Tyrell Malacia a hunga 90 minüt i Lutsharel Geertruida tabata na banki sin a logra hunga pa Feyenoord, unda nan mester a konformá ku derota di 2-0 na man di e ekipo di Fortuna Sittard.

Bundesliga na Alemania

Joshua Brenet tabata banki pa Hoffenheim, unda nan a logra empatá sin gol kontra Borussia Monchengladbach.

Jetro Willems a inisiá i wòrdu remplasá faltando 6 minüt pa final, den wega ku su ekipo Eintracht Frankfurt a gana di Bayer Leverkusen 2-1. Jetro inkluso a risibí un karchi hel den wega.

Bundesliga 2

Charlison Benschop un biaha mas tabata komo suplente sin logra pa hunga pa FC Ingolstadt 04. E biaha aki den wega ku nan a logra empate na 1 gol kontra FC Heidenkeim 1846.

Bèlgika su First Division A

E atakante Richairo Zivkovic a inisiá komo suplente i a drenta na minüt 69, pa asina hunga durante di e último 21 minütnan di wega pa Oostende, unda nan a kai vensí 2-0 na man di KRC Genk.

Chipre 1st League

Jarchinio Antonia no a mira akshon pa Omonia Nicosia, ora ku si e tabata na banki, den wega kontra APOEL Nicosia. Su ekipo a sufri derota ku skor di 2-1.