Oko Dap ta e kompositor di Rich Pieter den Tumba 2019

102
Mester wak e bon den Tumba 2019.
WILLEMSTAD,—-Ya pa na algun okashon nos a bin ta bisa ku Festival di Tumba 2019, ta bai bira un Festival ku masha hopi sorpresa mes. Paso tin algun kantante i kompositor ku tin algun aña sin partisipá den Festival di Tumba ta bèk otro aña.

Di informashon ku a drenta na mesa di redakshon di ‘E Mulina’, ta bisa ku e tres biaha ganadó di Festival di Tumba komo kompositor Oko Dap ku ta yu di nos Emperador i Tata di Tumba Boy Dap otro anan ta e kompositor di e Tumbero Rich Pieter.

Nos tin ku bisa ku Rich Pieter ta bèk despues di dos aña ku e la keda for di Festival di Tumba. E kantante en kuestion a partisipá na 6 okashon ku agrupashon musikal DREAMS i ku komposishon i areglo di Axel Pikero, na aña 2014 Rich a sali promé finalista ku e komposishon “Oloshi” ku e aña en kuestion ei a dal hopi duru den Curaçao Festival Center.

Pa loke ta trata otro aña e kantante Rich Pieter ta bin aden ku dos kambio grandi, paso e ta bai ku un komposishon di Oko Dap i aserka e ta bai ku agrupashon musikal E.R.A. Outéntiko. Pues sin duda mester tene hopi kuenta ku e kombinashon aki den Festival di Tumba 2019, kòrda ku ta for di 2013 Oko Dap ta gana Festival di Tumba komo kompositor, i Rich Pieter na 2014 a keda komo promé finalista.