Kontrali na rumor nan ku tin den kaya GENTZ ta den Tumba 49

178
Figo, figo nan ta den festival di Tumba 2019.

WILLEMSTAD,—-E dia nan aki ta masha hopi rumor tin den kaya rondó di agrupashon musikal GENTZ TRE’CHIC pa ku nan partisipashon den Festival di Tumba 2019. E banda ariba menshoná sin duda tabatin nan mihó aña partisipando di Festival di Tumba kaminda ku nan a sali promé finalista ku e kantante Raynor “Ray” Lauffer, ku a partisipá ku un komposishon di Amos Balentin ku su titulo ta “Mi’n ta lague kai”.

T’asina ku ya pa algun siman tin e rumor den kaya ku agrupashon musikal GENTZ TRE’CHIC no ta bai partisipá den Tumba 2019, pero no tin ku bisa ku esaki ta solamente un rumor nada mas. Ayera nos a drenta den kontakto ku Archel Calister ku ta gerente di e banda en kuestion , i nos a puntr’é kiko tin di bèrdat di e rumor nan ku tin den kaya ku bo banda no ta partisipá otro aña den festival di Tumba.

E la bisa ‘E Mulina’, lo sigui, “Nos ta on, on pa ku nos partisipashon den festival di Tumba 2019,mi por asta bisabu ku nos ta bai ku tres kantante, pero esaki por bira kuater tambe. Pues e rumor nan ku tin den kaya ta solamente puru rumor nada otro, fanátiko nan di GENTZ por keda trankil, paso boso banda ta den festival di Tumba”.Tambe nos a komprendé ku e banda tin hopi presentashon den e luna aki.

Pero ku manera aña bòltu nan ta bai konsentrá 100% riba nan partisipashon den Festival di Tumba 2019, ku ta riba dianan  4,5,6, 8 di febrüari. Tambe nos tin informashon nan GENTZ TRE’CHIC ta na Hulanda dia 5 di mart otro aña pa un presentashon grandi. Pues pa tur ku ta duda agrupashon musikal GENTZ TRE’CHIC ta partisipá den festival di Tumba 2019.