Mr Saab den front di Doble R SSS djaweps awor

341
Djaweps awor e ta riba Brion Plein den Front di Doble R SSS.

WILLEMSTAD,—-No tin duda ku e informashon aki a bai bira tópiko di kombersashon riba e dia di awe, i e sobra dia nan di e siman aki. Di informashon ku a drenta na mesa di redakshon di ‘E Mulina’, ta bisa ku djaweps awor e legendario kantante Sidney “Mr. Saab” Isidora lo bai presentá algun di su hit nan ku agrupashon musikal Doble R SSS.

Esaki ta bai tuma lugá riba Brion Plein, kaminda ku agrupashon musikal Doble R SSS ta presentá den e show “Bo Faktura Pidié Dun’é”. Otro informashon ku nos tin ta bisa ku, for di mañan e legendario kantante Mr. Saab ta kuminsá ensayá ku e legendario agrupashon musikal Doble R SSS.

Esaki sigur ta un super bon notisia pa fanátiko nan di e banda Doble R SSS i mas ku klaro fanátiko nan di e kantante Mr. Saab, paso pa basta ratu tur hende ker a mira e kombinashon aki huntu. Paso ta trata aki di e kombinashon ku tin asina tantu historia den nos farándula lokal. Kòrda ku ta 40 aña largu Rignald Recordino i Mr. Saab a traha huntu, i e kombinashon aki a hasi hopi historia tantu den nos Festival di Tumba pero tambe durante di mas ku kuater dékada.

Pues djaweps awor tur hende mester ta riba Brion Plein pa asina mira ku nan mes un wowo Mr. Saab despues di algun aña den front di agrupashon musikal Doble R SSS. Esaki sin duda ta algun ku bo no mag di pèrdè pa nada pero nada di mundu, paso despues di djaweps awor, no tin ningun garantia ku Mr. Saab lo bolbe presentá ku agrupashon musikal Doble R SSS.