‘E muchanan di Bombers’ ta pone rèspèt

199
E ekipo U-40 di Bombers.
WILLEMSTAD—Resientemente e ekipo di Bombers, pa di 3 aña, a organisá nan evento unda ku Bombers 40+ ta enfrentá Bombers U-40.

Tabata durante di e fin di siman tras di lomba, pa ta mas eksakto djasabra último, ku e ekipo di Bombers a tene nan aktividat di sera aña di sòftbòl.

Esaki unda ku a parti e ekipo den dos, repartí ku un ekipo formá pa e hungadónan bou di 40 aña di edat, kende a enfrentá e hungadónan riba 40 aña di edat.

Ta hopi mamamentu di gai tabatin durante simannan largu mirando ku e seri aki tabata 1-1, despues ku e promé biaha tabata e ekipo di Bombers U-40 a gana i e aña pasá tabata e hungadónan 40+ a bai ku e viktoria.

Na e okashon aki tabata e ekipo di U-40 ku a imponé rèspèt i ta logra viktoria ku skor di 16-2 i ta pone e seri awor na nan fabor 2-1.

Sigur e miembronan di Bombers a pasa un ratu super ameno manera semper ta e kaso i ta di remarka ku ta trata aki sigur di e ekipo di sòftbòl ku ta pone tremendo ambiente i mas ku un ekipo ta trata aki di un famia.

Un pabien pa e organisashon di Bombers, ku un biaha mas a demostrá di ta e mihó ekipo den Universo!

Un pabien ta bai na e ekipo U-40 di e organisashon Bombers, ku a sa di gana, pero semper tene kuenta ku un i tur tambe, lo tin di yega 40+.