‘Huma’ for di Hulanda a gana torneo di dominó

144
MIembronan di e ekipo di Huma.
WILLEMSTAD—E torneo di dominó ku a konta ku partisipashon di un ekipo, forma pa yunan di tera biba na Hulanda, kende ta ku vakashon riba nos isla, a keda ganá pa e ekipo bishitante.

Ta trata aki di e ekipo Huma, ku en realidat a buta huma den bario di Groot Kwartier. Un ke otro, durante di e torneo ku a konta tambe ku partisipashon di diferente ekipo lokal di dominó, ku a konta tambe ku diferente di e mihónan den dominó riba nos isla.

Den un torneo bon bringá, unda tabatin diferente tremendo premio, tabata e ekipo formá pa entre otro Gino Maria, Racha, Bado, Kops i Ren, ku a logra e premio máksimo.

Na segundo puesto den e kompetensia aki, a keda e ekipo di Dushi Kòrsou Dominó Team, miéntras ku Tuturutu a tèrminá na di 3 lugá.

E pareha formá pa Igmar i Monique, tabata esnan ku a traha e promé sapatu blanku di e torneo, miéntras ku e ekipo supkampion, Dushi Kòrsou Dominó Team, a bai tambe ku e premionan di ekipo mas disipliná i tambe e ekipo mihó uniformá.

Na final di e kompetensia, tabatin repartishon di premionan, unda esnan ku a risibí parti di esakinan sigur a bai kas kontentu, miéntras ku organisadónan tambe por mira atras riba un torneo di bon nivel i ku tremendo ambiente.

Miéntras tantu ya tin gritunan pa un ripitishon, unda ekiponan lokal, no a keda muchu kontentu ku e resultado final i lo kier saka sla riba e ekipo bishitante.