Mañan ta e dia ku ONE ta bai batisá nan Disko Kompakto nobo

156
Mañan nan ta bai batisá nan Disko Kompakto nobo den Le Ciel.

WILLEMSTAD,—-Mañan ta e dia ku agrupashon musikal “ONE” ta bai batisá nan Disko Kompakto nobo “The Number ONE Flavaz”. Esaki ta bai tuma lugá den Le Ciel. E evento aki ta unu super speshal, paso esaki ta e promé bes ku “ONE” ta lansa un CD riba merkado, den estilo di un presentashon Live di e piesanan riba e álbum.

Ta trata aki di un CD ku tin seis piesa ariba dje, ya e piesa nan kuminsá zona na diferente radio emisora, i mester bisa ku kada un  di nan ta hañando nan atenshon manera mester ta. T’asina ku djaluna tras di lomba e agrupashon musikal a presentá den Punda i nan a dal hopi duru.

Tambe nos tin informashon ku Dido-D ta trahando hopi duru pa asina su agrupashon musikal por duna un bon presentashon den Festival di Tumba di otro aña, e aña aki nan a hasi nan debut  kaminda ku nan a presentá ku tres Tumba i manda tur tres den e anochi final, kaminda ku Dibo-D i un biaha mas ta bolbe drenta den e tòp sinku. Pues mañan anochi bo tambe ta invitá pa ta na Le Ciel kaminda ku agrupashon musikal ta bai batisá nan Disko Kompakto nobo, esaki lo bai ta 7 or di anochi.