Mijail Eisden kampeon di Dam Rápido Kòrsou 2018

123
Parti di premiashon den dam.
WILLEMSTAD—Federashon di Dam Kòrsou (FDK) a tene nan delaster evento di dam, kual tabata e kampeonato Dam Rapido. E hóben Mijail Eisden a titulá kampeon di forma invikto.
Tabatin na tur 17 partisipante den e kampeonato, ku a tuma lugá na Kas di Dam, na Sta. Maria Gallery.

Clayton Angela i Mijail Eisden a sali i gana tur nan promé kontrinkantenan i mester a enfrentá otro den e di kuater buèlta, unda aki tabata Eisden, kende a kue bentaha riba tur otro partisipantenan ganando di Angela.
Miéntras ku Clifton Agata kometiendo un fayo garafal,  entregando 3 piedra, ta pèrdè su wega i su chèns pa sali den e promé 3 finalistanan.
Carlos Lorevil i Raoul Alias tambe ta pèrdè nan weganan, ku tabata kompletamente ganá kaba.
Finalmente e 3 promé finalistanan, a resultá:
1.Mijail Eisden ku a optené 13 punto.
2.Raoul Alias ku 12 punto.
3. Gabriel White ku 12 punto.

Raoul Alias i Gabriel mester a enfrentá otro den un partido di deskite, ku a wòrdu ganá pa Raoul Alias.
Raimy Willems, despues di tabata ousente pa algun aña ta bolbe i a hunga sin pèrdè ningun wega, pero a empatá mayoria di su partidonan.
Na final a hasi entrega di premionan di hinter aña, unda den kampionato di Timnan, Tim E’zet tabata kampion, siguí pa e  supkampion Solushon i na di 3 lugá tabata e ekipo ‘Super Hende Riba Ròndu’.
E hungadónan ku mas a destaká tambe a risibí premio. Clifton Agata i Rudsel Wolf respektivamente 1 ku 2 pa ku e ekipo E’zet i Carlos ku 3 premio pa Solushon.
Den kampionato nashonal señior, e kampion tabata Raoul Alias, supkampion Carlos Lorevil i na di 3 puesto Mijail Eisden.

E federashon mes, tambe por mira atras riba un tremendo aña, unda ku tambe tabatin diferente evento internashonal, ku miembronan a kompetí den dje.

Finalmente tabatin un ambiente ameno, ku vários wega di amistat i tambe serada di aña ku bríndis.
Direktiva di FDK ta gradisí un i tur di kurason, deseando nan tur kos bon pa ku e dianan di fiesta benidero i ta konta ku e sosten/apoyo den 2019 tambe.