Omar Westmaas i Sharmayne Carolina tabata e MVP nan den rugby

219
Akshon den wega rugby
WILLEMSTAD—Resientemente, durante di e fin di siman ku ta tras di lomba, pa ta mas eksakto riba djadumingu dia 16 desèmber 2018, Federashon di Rugby Kòrsou a sera nan aña.

Esaki unda pa promé biaha, tabatin un torneo super 10s.

 

Tabata weganan ku a tuma lugá, unda e dos ekiponan nashonal femenino di e federashon, Pixies CRC i tambe Dolphins CRC a mira akshon. Un ke otro huntu ku 3 ekipo nashonal maskulino. Ta trata di e ekiponan Wara Wara CRC, Curaçao Students RC i tambe Lycans CRC.

E weganan di e kompetensia aki, a mira akshon riba tereno di FFK na Brievengat.

Tabata un lucha fuerte pa e trofeo i premio máksimo, ku a hasi e enkuentro unu interesante i emoshonante pa por a disfrutá di dje.

Finalmente tabata e ekiponan di Curaçao Students RC i Pixies CRC, ku a logra pa gana e torneo.

 

Esnan presente sigur a gosa, unda entre otro tabatin tremendo moveshon i hugadanan di entre

Cristeffer Christina, Cayric Allie, Andrew de Pool, Boris van Noort di Curaçao Students RC i tambe di Crystal Gonet, kende ta miembro di Pixies CRC.

 

E ekiponan kontrinkante a duna e ganadónan fuerte bataya, unda entre otro Lycans i Wara Wara tambe tabata ekiponan ku a destaká.

 

E torneo a keda dirigí pa rèfri Manuel Jove, sin ningun partikularidat.

Apesar ku e weganan tabata unu tras di otro, tabatin e oportunidat pa asina por a filma algun entrevista, unda kapitannan di e diferente ekiponan, e presidente i tambe coachnan, por a komuniká ku miembronan di prensa.

Deporte Vigilante tambe tabata presente i a inmortalisá parti di e weganan di e torneo, kual sigur organisadónan a keda sumamente kontentu kuné.

 

Miéntras tantu por mira tambe atras riba un tremendo torneo, unda ku hóben talentonan ku ta práktika e deporte aki, por a demostrá nan talentonan i tambe nan tremendo desaroyo i talento.

Esaki sigur pa entre otro esnan mas nobo den e deporte kende apénas a inskribí na luna di Novèmber último, despues di un kurso di introdukshon.

 

Coach Robert Perry a duna di konosé di ta sumamente satisfecho i tabata esun tambe pa duna medaya pa e mihó hungadónan, respektivamente maskulino pa Omar Westmaas i femenino pa Sharmayne Carolina, kende tabatin tremendo presentashon.

 

“Pa loke ta aña 2019, e federashon di rugby di Kòrsou tin hopi kos riba programa, unda ku tambe tin speransa nan grandi”, e presidente Tamara van Leeuwen, a duna di konosé.