Sigmar Carmelia ta gana tradishonal torneo “Kerstbout”

184
Parti di e famia di e deporte di pinpòn.
WILLEMSTAD—Federashon Tènis di Mesa Kòrsou a sera su aña en grande, ku su tradishonal torneo “Kerstbout”. E meta prinsipal di e torneo aki tabata pa tur miembro bin huntu i selebrá e klousura aki ku pinpòn, kome i bebe, risibí regalu i reflehá un ratu kon a bai ku pinpòn aki na Kòrsou den e aña ku ta yegando su final aki.

Pa loke ta pinpòn a inskribí 26 miembro ku a hunga algun partido bou di sistema di hèndikèp ku e propósito pa e hungadónan di ménos nivel haña un chèns pa gana esnan mas fuèrte. Ta un kompetensia no tan serio manera otro torneonan, pero mas pa disfrutá i gana premio despues. Asina pues por a kome i bebe durante e enkuentronan.

Despues ku weganan a ranka sali, unda ku sigur tabatin un 50 wega ku a wòrdu hungá pa un sèt, tabata Sigmar Carmelia i Jacinto Zimmerman, ku a bin resultá den e gran final.

E gran final a keda ganá pa Sigmar Carmelia. Promé ku partimentu di e premionan presidente di e federashon, ‘Napi’ Boekhoudt, a mira bèk kon tur kos a bai e aña aki i a konkluí ku tabatin kos bon, manera kon tur e aktividatnan a desaroyá.

Tambe e la pone énfasis na e parti ménos bon, ku ta e poko hubenilnan ku tin den federashon aktualmente i tambe e poko aktividatnan bou di e damanan.

Puntonan ku mester buska moda di mehorá den e aña benidero. Seguidamente tabatin partimentu di regalo, unda Sigmar por a bai hasi e promé eskoho i despues tur hungadó por a bai mesa den sekuensia bai skohe nan regalo. Asta esnan ku no a hunga, pero ku a yuda den e kousa aki, a risibí un regalo.

Despues a sigui sosialisá te lat den atardi, kaminda asta dominó a bin kai aden. Tabata un tremendo Djadumingu na Sala Rekreo Irene Moreno na Muizenberg.

Federashon ta gradisí tur ku a yuda i ta deseá tur su miembronan, prensa i demas fanatikonan di pinpòn, tur kos bon pa e dianan di fiesta i un próspero aña nobo.