Sybren Boekhoudt kampion den Bola 8 individual Kòrsou

166
Premiashon den e deporte di biar.
WILLEMSTAD—Federashon Biar Kòrsou, a sera aña 2018 ku su último aktividat, ku tabata e kampionato Bola 8 individual pa e titulo di kampion di Kòrsou.

Tur esaki a tuma lugá na Pool Arena na Gosieweg i a konta ku partisipashon di 24 biardista. E evento a konta ku partisipashon di e veterano Ryan Hellmund, kende tabatin vários aña inaktivo.

Ryan den salida ta gana e faborito Sybren Boekhoudt ku skor di 6-2. Den e promé partido di semifinal den buèlta di ganadó Ryan ta gana di Gemajel Rol, ku skor pèrtá di 7-6.

Den e otro partido di semifinal den buèlta di pèrdèdó Sybren Boekhoudt ta gana Rol 7-1. Boekhoudt ta drenta e partido final ku 6 viktoria tras di otro, pa bin topa Hellmund den final i gana e partido aki ku skor pèrtá 8-7.

Empatá na puesto 5, a keda David Prins i Jeffrey Nieuwenhuyzen. Puesto 4 a bai pa Salim Kuzi. Puesto 3 e resultá pa Gemajel Rol. Supkampion di Kòrsou, a resultá Ryan Hellmund, kende tabatin un tremendo kòmbèk. Miéntras ku e kampion di Kòrsou, meresidamente a resultá Sybren Boekhoudt.

Ku e resultado aki, Boekhoudt a pasa pa posishoná su mes komo number 1 di e ranking ofishal.

Ku e resultado di e último evento, tambe e 4 representantenan ofisial pa kampionato Panamerikano 2019, ta bira konosí. Esakinan lo ta Sybren Boekhoudt, Jeffrey Nieuwenhuyzen,  Julian Rijna i Shandro Paula.

Federashon Biar Kòrsou kier a felisitá tur e finalistanan i alabes kier a deseá tur su miembronan un Bon Pasku i un Felis 2019. Tambe Febiko mesora kier a gradesí tur medio di komunikashon i tur redaktor deportivo ku a duna un tremendo man pa publiká tur nan notisianan di biar.

Ta deseá boso tur, un Felis Pasku i un Bon Aña 2019. Danki pa boso sosten i nos di FeBiKo ta konta ku boso den 2019 tambe.