Sin korte: wes a kondená Jamaloodin sin un wisio penal
Punda– Un komunikado di prensa emití pa Korte Komun na Willemstad, ta kontra di derechinan humano. Sin un tratamentu penal publiko, Korte Komun na Kòrsou a kondená Jorge Jamaloodin komo e finansiadó di e asesinato riba Helmin Wiels.

Segun e komunikado Korte di Apelashon, sin tabatin niun tratamentu, a kondena èks minister Jorge Jamaloodin komo esun kende a duna e tarea pa asesiná Helmin Wiels riba 5 di Mei 2013. Esaki por a konkluí despues ku den nan veredikto kontra di Nini Fonseca, korte a splika ku Fonseca a tuma e tarea serka Jamaloodin pa mata Helmin Wiels. Hasta den nan komunikado di prensa, Korte di Apelashon tabata hopi spésifiko na bisa ku ta Jamaloodin a duna e tarea.

Ta promé biaha den historia den persekushon penal ku Korte di Hustisia ta ekspresá kulpabilidat di un persona sin tratamentu penal a tuma lugá. Di tal manera ta bira imposibel pa spesifiká riba kua hechos i base hurídiko Korte di Apelashon ta kondenando Jorge Jamaloodin.
E komunikado di Korte Komun, ta haña sosten tambe den e veredikto di Fonseca. Esaki ta algun punto importante ku Korte ta basa su mes ariba:

1. Na Promé lugá, korte ta pensa ku Jorge Jamaloodin no a aserká Nini Fonseca den promé instansha, sino a bai dirèkt serka defuntu Pretu Florentina pa buska un asesino pa Helmin Wiels. Segun splikashon di Korte, ta despues ku Jorge a papia ku Florentina, Nini Fonseca a drenta e senario pa asesinato di Wiels.

2. Korte ta kombensí, ku e sms nan entre Jorge Jamaloodin i Nini Fonseca tin relashon ku e plan pa asesiná Wiels. Korte no a aseptá e argumentashonnan ku Nini a duna riba e motibu di e sms nan.

3. E pagonan. Korte a aseptá deklarashon di dos (èks) empleado di Jamaloodin. Tin deklarashonnan spésifiko den kua enfelòp Nini tabatin bin buska sèn serka Jamaloodin. Tambe pa korte ta importante ku ruman hòmber di Fonseca a bini rabia un dia na kantor di Jamaloodin.

4. Deklarashon di un testigu, probablemente konosí di Florentina. E testigu a bisa di a skucha kòmbersashonnan  di negosashon den garashi di Florentina.

5. Deklarashonnan di Edsel Gumbs. Èks hefe di   Servisio di Siguridat Nashonal i di Inteligensha. Gumbs a inkriminá Jamaloodin via di un testigu kende a papia ku’ne. Korte no a konsiderá ku ta Jorge Jamaloodin, komo minister suplente di Asuntunan General a retirá Gumbs for di su posishon.