E di seis edishon di JetSet a dal durisimo den Club Spoonz

267
Kos tabata kayente den Club Spoonz.

WILLEMSTAD,—-Djadumingu tras di lomba a tuma lugá e di seis edishon di Fiesta JetSet, na e okashon aki e fiesta a tuma lugá den Club Spoonz. Ta trata aki di un fiesta ku a keda organisá pa e duo forma pa Vader Volk i Oompie ku un biaha mas a bolbe demostrá ku nan ta para pa kalidat di un super bon fiesta.

Pa loke ta trata e di seis edishon di JetSet Vader Volk i Oompie a skohe pa tres e kombinashon forma pa Highway Band i ICONS BY GIO, tambe tabata tei den e lugá Dj RO-1 i MC Chris Strick ku a perkurá pa pone super bon ambiente den Club Spoonz.

Di informashon ku a drenta na mesa di redakshon di ‘E Mulina’, ta bisa ku for di djabièrnè 21 di desèmber tras di lomba, e dou forma pa Vader Volk i Oompie Stroop a kanta Sold Out, esaki sigur a trese un trankilidat serka di e dos promotor nan, paso no ta tur fiesta den luna di desèmber a bai manera mester ta.

E agrupashon musikal ICONS BY GIO a kuminsá stèmpel nan nòmber den nos farandula lokal. T’asina ku despues di kada presentashon di e banda ICONS ta bon komentario so ta keda tras, esaki sin duda ta vitamina i energia positivo pa tur e músiko nan di e banda ariba menshoná, nos tin ku bisa ku e banda ta zona grandi i bestial, i e kantante nan ta hasi e trabou ku tur hende ta spera di nan, tambe nos tin ku bisa ku Highway Band a buta hopi ambiente den Club Spoonz. Un pabien ta bai pa e dos promotor nan ku ta Vader Volk i Oompie Stroop, paso un biaha mas nan a bolbe demostrá ku nan ta para pa kalidat i bon fiesta.