Pasku mainta ku Maria Diwan na Radio Z86

121
Maria sinta den studio di Z86.

WILLEMSTAD,—-Lokual a bira un tradishon pa mas ku sigur 20 aña kaba, a kontinuá Pasku mainta,  kaminda Sra . Maria Diwan tin un programa for di 9 or di mainta te ku 12 or di mèrdia na Z86.

Den e programa aki hopi inspirativo, Maria ta invitá semper un persona ku ta papia riba e parti spiritual pa despues su hendenan di tur aña ta bini pa deseá Maria un bon aña i tambe kompartí ku su radio eskuchanan,e kosnan bon ku a pasa durante di aña i tambe  e kosnan ku nan ke wak mehorá den e aña nobo.

E aña aki Sr. Pietje Sluis tabata den e programa,i di un manera masha profundo i bon Sr. Sluis a elaborá riba e tema di Pasku mira for di e punto di bista di humildat. Sin mas e persona ku no tabata konosé Pietje,  a haña e oportunidat pa konosé e kabayero aki mas di aserka.

Despues di esei e invitadonan a drenta i pa hopi di nan tabata un enkuentro atrobe despues di un aña. Hopi di e bishitante nan tabata tin un deseo pa kompartí ku Maria i e oyentenan. E dushi di e enkuentro aki ta ku esaki ta algu hopi spontáneo i ningun hende den e studionan di Z86 ta sinti e preshon di kiko nan tin ku bisa  si  òf no.  Un hopi dushi programa. Maria a demostrá un biaha mas ku no ta pòrnada, di djaluna te ku djabièrnè e ta lanta tur hende ku su mensahenan inspirativo I tambe ta rekordá nos riba hasimentu  di aña di diferente di nos kon siudadanonan.

Komo ku tabata  Pasku,  e ayaka ku e chukulati no por a hasi falta, pa pasa boka kuné.  Na final tur e yunan sin doló di Maria a probechá saka un potrèt kuné pa asina rekordá e dushi mainta ku tur hende a pasa huntu. Maria manera mi a yega di bisa bo diferente biaha den pasado,   Dios duna bo hopi aña mas di bida , forsa i salu pa nos sigui disfrutá di e positivismo ku bo ta inspirá nos,  tur mainta.