Quincy Cicilia por ta rumbo pa un banda den ámbito di Kòmbèk

199
Tin un banda den ámbito di Kòmbèk ku tin hopi interes den e kantante aki.

WILLEMSTAD,—-No ta falta masha dia mas pa aña 2018 yama ayó, pero ketu bai tin moveshon nan ta tumando lugá den nos farándula lokal. Di informashon ku a drenta na mesa di redakshon di ‘E Mulina’, ta bisa ku, tin moveshon nan rondó di e kantante Quincy Cicilia.

Quincy ta yu di e legendario kantante Dennis Cicilia, nos fuente a bisa nos ku tin un agrupashon musikal den ámbito di Kòmbèk ta mustrando hopi interes den servisio di e hóben kantante ku ta forma parti di e proyekto TUNE.

Nos tin nòmber di e agrupashon musikal ku por bai bira e posibel banda nobo ku Quincy por pasa forma parti di dje. Pero pa no stroba di e negoshashon nan ku tin ta tumando lugá, nos ta wanta un ratu pa menshoná nòmber di e agrupashon musikal en kestion, pero nos ta sigui vigilá e moveshon aki ku wowo nan di falki.