Vários víktima fatal den tráfiko a resultá di ta hóben “ adulto”

556
E aksidente frontal i fatal a tuma lugá riba Winston Churchillweg.
Willemstad—  E aña aki Kòrsou a registrá vários aksidente fatal den tráfiko unda ta hóbennan i òf hóbennan adulto  a bin resultá di ta  víktima. Vigilante lo bai trata di rekordá algun di e víktimanan aki. Forsa sigur ta bai  na e famianan ku a keda tras.

Un di e víktimanan ku Vigilante ta bai relatá di dje ta un dama di 25 aña ku a bin fayesé den un aksidente frontal riba Winston Churchillweg.Tabata djasabra 7 aprel 2018, alrededor di 04.03 or sentral di polis a haña notifikashon ku riba Winston Churchillweg tin un dalmentu entre dos outo i ku tin vários herido .

Na yegada di e patruya polisial nan a bin topa ku e dos (2) outo. Un Ford Focus kòrá i outo number 2: Un Scion pretu. Tabatin total kuater (4) herido (2 hòmber i 2 dama) den outo number 1. Un di e víktimanan, un dama ku tabata sintá dilanti banda di shofùr di outo number 1 no tabata duna señal di bida. Den outo number 2 tabatin solamente e shofùr ku a sinti poko doló na su hep.

For di un investigashon preliminar ku polis a realisá na e sitio a resultá ku e shofùr di e outo number 1 (Ford Focus kòrá) tabata kore riba Winston Churchillweg direkshon Sta. Maria miéntras shofùr di outo number dos (Scion pretu) tabata kore riba mesun kaya pero direkshon kontrali (direkshon rio Canario). Pa un motibu ku te na e momento aki ta den investigashon, e hòmber shofùr 27 aña di edat, ku tabata manehá e outo number 1, e Ford Focus koló kòrá, a desviá na su man robes i a sigui kore einan ku konsekuensia ku e la bin dal frontal kontra outo number 2 ku e konsekuensia ariba menshoná.

Alrededor di 04.50 or dòkter di polis a konstatá morto di e dama Raïsha Rationella Offerman, nasé na Hulanda 15 febrüari 1992 ku tabata sintá dilanti banda di e shofùr den outo number 1. E víktima aki a haña un fraktura na su nèk.

E mesun wikènt ei esta dia 8 di aprel Kòrsou a registrá otro morto den tráfiko na momento ku un vehíkulo mester a baha for di kaminda bai dal kontra di un palu. Esaki a bin sosodé riba e kaminda di Banda Bou na altura di e bario Hanchi Buriku.

Tabata den  oranan di anochi a pidi presensia urgente di Polis, ambulans i tambe e tim di reskate di Brantwer pa yega mas lihé posibel riba e kaminda di Banda Bou na altura di e bario Hanchi Buriku òf Klein Sta Martha pa un vehíkulo ku a bai dal kontra di un palu di indju ku dos persona den dje. For di esnan ku a yega na e sitio di e aksidente por a komprondé ku tur e dos okupantenan den e vehíkulo tabata den un estado basta delikado. Na yegada di Polis i tambe ambulans a bin konstatá ku tantu e shofùr komo e okupante ya no tabata reakshoná mas esta ku no tabata duna señal di bida. Mesora a pidi presensia di e demas outoridatnan pa yega na e sitio pa por a kontinuá ku e investigashon. A bin resultá ku e shofùr a bin fayesé debí na un kaso di asesinato miéntras e okupante a bin pèrdè su bida debí ku e vehíkulo a dal violentamente kontra di e palu di indju.

Tabata na altura di Hanchi Buriku ku e okupante den e vehíkulo a bin pèrdè su bida debí ku e la kibra su nèk.

 

 

 

 

 

 

Djabièrnè 26 di òktober 2018, alrededor di 22.59or, Sentral di polis a dirigí un patruya na Bragadushiweg pa un aksidente di un motosaikel.

Na yegada di e patruya nan a bin topa un hòmber drumi abou ku sla na su kabes i ku tabata sangra bastante.For di un investigashon preliminar ku polis a realisá na e sitio, a sali na kla ku e shofùr di e motosaikel un ratu promé tabata pone ‘fever’ den e kaya ariba menshoná i a pèrdè kontròl bai dal kontrá di un muraya. Debí na e múltiple leshonnan aki e shofùr di e motosaikel a fayesé na e sitio.

Alrededor di 00.50or dòkter di polis a konstatá morto di e motosiklista, e hòmber Myron Peter Rene Jean Franncios, nasé Kòrsou dia 26 novèmber 1997.

Departamento di Tráfiko ta kontinuá ku e investigashon.

Hóben ku a pèrdè kontròl dal kontra muraya i fayesé.

 

 

 

 

 

 

 Djaweps 22 di novèmber 2018, alrededor di 01.53or di mardugá, Sentral di Polis a haña notifikashon ku riba Presidente Romulo Betancourt Boulevard tin un aksidente di tráfiko.

Na yegada di e patruya polisial el a bin topa ku un vehíkulo ku a aksidentá i un (1) herido.For di investigashon ku polis a hasi na e sitio a resultá ku debí na velosidat haltu, e shofùr a pèrdè kontròl riba su stür i a bai dal kontrá di un muraya pa despues bai bòltu i a keda pegá den e vehíkulo .

Debí na múltiple leshonnan e víktima a fayesé na e sitio.Ku yudansa di Brantwer a saka e víktima for di e vehíkulo.Pa 02.45 dòkter di polis a konstatá morto di Rachid Erol Sandino Cova, nasé na Kòrsou dia 3 di febrüari 1986.

Otro hóben ku a bin pèrdè su bida den tráfiko.

 

 

 

 

 

Djadumingu 2 di desèmber alrededor di 06.21’or, Sentral di Polis a risibí informashon di un aksidente di tráfiko grave ku a tuma lugá riba Weg naar Westpunt na altura di Daniel.

Na yegada di e promé unidat, el a bin topa dos vehíkulo (outo di famia) ku a dal frontal kontra di otro i di kua ámbos shofùr tabata den un situashon hopi kritiko.Na yegada di personal di ambulans, esaki a konstatá ku e víktimanan no tabata duna señal di bida.Dòkter di polis ku a yega na e sitio a konstatá morto di e dama Aydeline Ster, nase na Kòrsou 19 di yüli 1986.

For di investigashon preliminar a resultá ku shofùr di e vehíkulo ku tabata bai den direkshon di Banda Bou a bai pasa un vehíkulo ku tabata kore su dilanti i bai dal frontal kontra e otro vehíkulo ku tabata bini for di direkshon kontrario.

Kaminda bai Banda Bou unda e aksidente fatal a tuma lugá.

 

 

 

 

 

 

 Djaweps 20 di desèmber 2018, alrededor di 03.30or un patruya polisial ku tabata kore riba brùg Juliana di Otrobanda dirèkshon Punda a topa ku un aksidente entre (2) motosaikel ku dos (2) herido.

For di un investigashon preliminar ku polis a realisá na e sitio, a sali na kla ku un shofùr di un di e motorsaikelnan a para ku su motorsaikel riba brùg ku konsekuensia ku shofùr di e motorsaikel ku tabata biniendo su tras a dal den dje.

Dor di e impakto un di e shofùrnan a fayesé na e sitio i e otro a keda transportá ku ambulans pa Poli di SEHOS den un situashon di preokupashon.

Alrededor di 04.35or dòkter di polis a konstatá morto di e motosiklista, e hòmber Wladimir Humphrey Anacleto Alberto, nasé Kòrsou dia 13 yüli 1979.

Riba brug motosiklista a bin pèrdè su bida.

 

 

 

 

 

Djamars 25 di desèmber alrededor di 07.13’or, Sentral di Polis a risibí informashon di un aksidente di tráfiko ku a tuma lugá riba Winston Churchillweg.

Na yegada di e promé unidat, el a bin topa un vehíkulo (outo di famia) ku a dal frontal kontra di un poste di heru kantu di kaminda ku ta indiká direkshon i e shofùr un dama tabata den un situashon hopi kritiko.Na yegada di personal di ambulans, esaki a konstatá ku e víktima no tabata duna señal di bida.

Dòkter di polis ku a yega na e sitio a konstatá morto di e dama shofùr, Marvetty Altagracia Ignacio, nasé na Kòrsou dia 15 sèptèmber 1995.

For di investigashon preliminar a resultá ku shofùr di e vehíkulo ariba menshoná tabata kore riba Winston Churchillweg den direkshon di Sta. Maria i pa un motibu ku ta den investigashon a baha for di kaminda na banda drechi i bai dal den e poste ku e konsekuensia ariba menshoná.A konsekuensia di e múltiple heridanan ku e shofùr a sufri, e la bin fayesé na e sitio di aksidente.

Pasku dama basta hóben a aksidenta i fayesé.

 

 

 

 

 

Ta vários di nos hóbennan di un òf otro manera a bin pèrdè nan bida durante di e aña 2018 aki den aksidente.