Santa Rosa a pidi un suma reimu pa su libertat Riordan Windster no por bai for di Santa Rosa

186
Riordan Windster SS di Santa Rosa Indians kende no ta liber, pero kier move pa e ekipo Royal Scorpions. Su ekipo Santa Rosa ta pidiendo 5 pida pa laga e pelotero liber.
Willemstad,– E hóben shòrtstòp Riordan Windster kende a hunga temporada ku ta tras di lomba pa e ekipo Santa Rosa Indians, lo a mustra interes pa bandoná filanan Indjan i pa djòin su mes ku e ekipo Scorpion.

Informashonnan ku Vigilante a risibí ta indiká ku ya Scorpions lo mester a sòru pa e kos di hasi pa e hóben aki, pero ku e organisashon di Santa Rosa ta para duru ku nan no ta laga Windster liber.

Beisbòl na Kòrsou ta amatùr i konsekuentemente hungadónan no tin mag di risibí pago, pero ta un sekreto públiko ku esaki ta tuma lugá i kaminda tambe tin sumanan bastante serio involukrá.

Den e mundu di beisbòl ta ser bisá ku Santa Rosa ta úniko ekipo ku no ta paga (Nos no sa esei), pero tambe ta ser bisá ku nan no ta paga, pero nan kier risibí pago si pa hungadónan ku pidi nan retiru.

Riordan ta un ehèmpel di e situashon aki, kaminda Vigilante a komprondé di bon fuente ku Santa Rosa ta pidi Scorpions 5 mil florin pa haña e retiru di Windster kende no ta liber. Echo ta ku e ekipo Royal Scorpions ya a sòru pa e hóben aki a haña un trabou i ta spera ku e lo haña su retiru pa e djòin ekipo Kòra ku blanku.

Ounke ku no mag paga den beisbòl amatùr, nos mester ta realístiko, ku sin pago lo bo no haña e mihó hungadónan i kontrali na esaki, e mihónan di bo lo bai pa ofertanan ku nan ta risibí di otronan ku si ta paga, òf ku ta paga mas.