Hubentut Fortuna úniko ekipo invikto den di 2 divishon FFK

132
E ekipo di Hubentut Fortuna.
WILLEMSTAD—Pa loke ta segundo divishon di futbòl FFK, despues ku tur e 10 ekiponan a realisá tambe 5 wega kaba, e ekipo di Hubentut Fortuna, dirigí pa David Heykoop, ta e úniko ekipo ku no a konosé derota.

Sithoc na kabes

Esaki apesar ku ta e ekipo di Sithoc ta komandando riba e tabla di posishon ku 10 punto. Debí na 3 empate, Hubentut Fortuna ta na di segundo posishon, empatá ku Inter/Willemstad na punto, ámbos ku 9. U.D. Tera Kòrá ta sigui ku 8, Indekor i Atomic ku 7 kada unu, C.H. Mahuma ku 6, New Song tin 5 Deportivo Sta Rosa tin 3 i De Koning ta den sotano ku 2 punto, despues ku tur ekipo a hunga 5 wega te awor.

Sin triunfo

Deportivo Sta Rosa i De Koning, ku ámbos ta ekiponan ku a klasifiká temporada tras di lomba, ta e dos ekiponan ku ainda no konosé triunfo, despues di realisá 5 wega kada unu.

Mas gol anotá i risibí

Tantu Hubentut Fortuna, Inter/Willemstad, komo New Song, ta e ekiponan ku mas gol a anotá. Tur a anotá na 11 okashon den nan 5 weganan. Miéntras ku Atomic ta e ekipo ku mas gol a risibí. Durante di nan 5 weganan nan, nan a risibí 13 gol kontra.

Wega ku mas gol

E partido ku mas gol a konosé den di 2 divishon, tabata e goliada di 6-1, di Sithoc riba Atomic.

Gol i goliadónan

E parti di 2018, pa loke ta temporada 2018/2019 den di 2 divishon, a transkurí, unda e 10 ekiponan a anotá 89 gol. Jose Almonte di Atomic ta e máksimo goliadó te awor ku 6 gol den 5 wega. E ta wòrdu siguí pa Juwendrick Balochi (C.H. Mahuma), Benshemir Dall di U.D. Tera Kòrá i Johenry Lloyd di Hubentut Fortuna, kende nan a anotá 4 gol kada unu.