“Kòrsou….masha danki !!!”

239
DT Remko Bicentini.
WILLEMSTAD—Deporte Vigilante den kurso di e último dianan i tambe ayera tabata den kontakto i tambe huntu ku e tékniko di nos selekshon nashonal di futbòl, Remko Bicentini.

Remko ta ku vakashon na Kòrsou, den kompania di famia, unda e la pasa dianan di fiesta di Pasku i tambe lo pasa kambio di aña.

Ta trata aki di un tremendo persona i sigur orguyoso i agradesido pa e sosten risibí. Un ke otro tantu na su persona i sigur pa ku nos selekshon, pa loke ta e aña tras di lomba.

 

DANKI !!!!

“Mi kier yama Kòrsou danki. Esaki pa nan sosten, tantu promé, durante i despues di tur nos kompromisonan. No tin palabra pa gradisí i tampoko deskribí kon Kòrsou kompletu, i kada ken na nan manera a biba ku nos logronan.

Fanatikonan den stadion animando, tokando i formando ola, miéntras ku riba kaya, tambe semper tin e reakshonnan.

Sin duda tabata un bon aña, unda ku nos a hunga 2 wega amistoso i 3 bálido pa Concacaf Nations League, unda nos a logra 3 triunfo pa goliada sin risibí gol kontra i a anotá na 21 okashon.

Pa loke ta e aña benidero, sin duda ta e intenshon pa bai ainda mihó. E meta ta pa alkansá Qatar, unda naturalmente tin algun logro pendiente riba e ruta.

Ku e sosten di Kòrsou durante di aña 2018, sin duda e tim tabatin kompaño di e di 12 hungadó. Mi ta sumamentu kontentu i orguyoso tambe ku e hungadónan mes. Semper nan ta kla pa duna tur ku tin i logra metanan.

Nos lo sigui traha duru i ta keda di focus i sigui posibel refuersonan. Mas fásil nos gana, tin ora mi ta pensa ku ta asta mas difísil ta pa dirigí, pa motibu ku tur hungadó ta duna lo máksimo i semper kier logra mas.

Mi ta felisitá e hungadónan i mi kuerpo kompletu, huntu ku Kòrsou, unda por mira atras riba un gran aña. Pa 2019, nos promé meta ta pa ta parti di e Grupo A di Concacaf, pa seguidamente kana yega Qatar. Un bon aña pa un i tur i nan famia”, Remko a finalisá bisando ayera, den un mensahe ku e kier a kompartí ku Kòrsou i tambe yunan di Kòrsou ku a i ta biba i sostené nos ekipo nashonal di futbòl.