Scherpenheuvel komandando den futbòl lokal

136
Kenneth 'Bob' Bernabela, tekniko di Scherpenheuvel.
WILLEMSTAD—E ekipo di Scherpenheuvel ku ta konta ku dirigimentu di tékniko Kenneth ‘Bob’ Bernabela ta komandá den promé divishon di futbòl FFK. Esaki despues ku tur 10 ekipo a hunga 5 wega den aktual temporada i awor tin un paro, pa dianan di fiesta i kambio di aña, unda ta programá pa sigui djabièrnè benidero, dia 4 yanüari 2019, ora Vesta topa ku Centro Domnguitu, pa 8’or di anochi na Kintjan.

Invikto

Scherpenheuvel, huntu ku Centro Dominguitu, ta e dosnan ku ainda no a konosé derota i ketu bai ta invikto, pa loke ta e parti di 2018, pa loke ta e kampionato 2018/2019.

Scherpenheuvel a logra triunfo den tur nan 5 weganan realisá i ta na kabes di e tabla di posishon ku 15 punto. Centro Dominguitu ta sigui nan ku 13 punto, ku ta produkto di 4 triunfo i un empate, den nan 5 weganan realisá te awor.

Standing

Despues di Scherpenheuvel ku 15 i Centro Dominguitu ku 13 punto, e standing ta sigui ku Undeba (10), Centro Barber (7), Victory Boys (6), Inter/Willemstad i Vesta (5), Jong Holland 4, S.U.B.T. 2 i Jong Colombia ku 1 punto den sotano, ta esnan ku ta sigui riba e tabla di posishon.

Sin triunfo

Pa loke ta e 10 ekiponan aki, 2 di nan ainda no a konosé triunfo, kual nan ta S.U.B.T. i Jong Colombia. E barikanan hel a logra 2 empate i a pèrdè na 3 okashon, miéntras ku e samineronan, a pèrdè 4 okashon i empatá na 1 okashon den nan 5 weganan efektuá.

Mas i ménos gol anotá

E orguyonan di bándabou, Undeba ta e ekipo mas goliadó, ku 18 gol den 5 wega, miéntras ku e ekipo ku ménos gol na fabor ta Victory Boys, ku a logra pa anotá na solamente 3 okashon.

Mas i ménos gol kontra

Jong Colombia a risibí mas gol kontra, ku 15, ku ta un promedio di 3 gol kontra pa wega, miéntras ku Scherpenheuvel a risibí solamente 1 gol kontra te awor. E gol aki, tabata tambe un outogol, ku nan a anotá hustamente den wega kontra di e ekipo saminero, Jong Colombia. Esaki ta hasi mesora kiper Rowendy Sumter, komo esun ménos goliá.

Karchinan

Pa loke ta karchinan, Centro Barber ta e ekipo ku mas karchi a risibí. Tantu den kòrá komo den hel nan ta komandá, despues di risibí 3 kòrá i 18 hel.

Miéntras ku Scherpenheuvel ta e ekipo mas disiplina te awor, ku 7 karchi hel risibí, sigui pa Victory Boys ku a risibí 8 hel sin kòrá.

Goliadónan

E futbolista kende mas gol a logra pa anotá te awor ta Norvianell Naar di Undeba, ku 8. E ta wòrdu siguí pa Jurensley Martina di Centro Barber ku tin 5 i respektivamente Jimbertson Vapor di Scherpenheuvel i Geryon Alberto di Centro Dominguitu, ámbos ku 4 gol, miéntras ku Vaylison Lake di Inter/Willemstad i Mirco Colina di Vesta a anotá 3 gol kada unu.

Esaki despues ku e promé divishon di futbòl FFK, a konosé 78 gol te awor, di kual 4 ta outogol.

Wega ku mas gol

E partido ku mas gol a konosé te awor tabata e goliada di djadumingu, dia 9 desèmber último, na momentu ku Undeba a suta e trikolornan di Jong Holland, sin kompashon ku skor di 7-1.