Stanley Clementina ta pone su promé álbum riba merkado

74
Awe su EP ta kuminsá zona na diferente radio emisora lokal.

WILLEMSTAD,—-Stanley Clementina ta wak bèk riba 2018 ku satisfakshon, unda e la marka pouta ku vários kansion ku a bira hit na Kòrsou, Aruba i Boneiru. Manera e la primintí fo’i kuminsamentu di aña, e talentoso kantante, kompositor i areglista porfin ta deleitá nos ku YDK,  su promé  EP ku ta konsistí di hitnan manera ‘Komehein, ‘Basil’e’ i ‘Kulpa mi Numa’.

Pero riba YDK  tambe tin algun kansion nobo manera ‘You Wine It’, ‘T’asina Ta Biba’ i ‘Mama Told Me’ ku Ori, kual su video clip lo sali pronto. Tambe Stanley a kolaborá ku algun artista kurasoleño talentoso manera  Dayo (Strea Nobo) riba ‘T’asina Ta Biba’, kantante di Urban Dopie riba ‘Basil’e’, i Muisjemuis riba ‘Kulpa Mi Numa’.

Tur kantika riba YDK a keda kompositá i skibi pa Stanley mes, pero tambe e la a kolaborá ku vários produktor di renombre manera Zurich Musiq, kende a produsí vários hit pa Broederliefde, i MB Ghettoflow, un di e produktor di reggaetón mas buska di Europa. Pero e chèri riba e bolo ta e ‘remix’ di e hit ‘Komehein’ huntu ku e famoso rapper Dongo, kual ta optenibel riba YDK.

Por haña YDK riba vários plataforma digital musikal, na diferente diskobar popular òf despues di Stanley su presentashon nan. Awe ta e dia ku Stanley lo lansa su álbum YDK na Hulanda huntu ku su banda C-Shaw, pero ta premirá di regresá Kòrsou na 2019 pa algun presentashon, banda di vários proyekto eksitante.

Stanley a kaba di haña e título i sosten di Fonds Podium Kunsten, unda e la haña un supsidio pa internashonalisá papiamentu ku músika. Ora aña habrí, Stanley lo lansa un kolaborashon ku Muisjemuis i Richie Rich, pa despues e bai New York na mart pa hasi algu presentashon. Despues di esaki, Stanley lo lansa un bomba huntu ku Jandino i Dongo. Tambe na  yüli/ougùstùs 2019 Stanley ta plania pa bishita Nashville, Memphis i Chicago pa topa ku produktor i kompositor dekorá Tommy Sims.