Muhé ta establesé rèkòrt nobo dunando lus na oochi ku basta dia di diferensia

101
Ta trata aki di un sèt di oochi hòmber i muhé.

BRITANIA – E muhé britániko identifiká komo Vicky Green a duna lus na un set di oochi ku 12 dia di diferensia, establesiendo di e forma aki un rèkòrt nobo pa ku e tempu di diferensia entre nasementu di oochinan na Reino Uní.

Green, kende ta traha komo un asistente di enseñansa na un skol di muchanan ku nesesidatnan spesial, a rekonosé na medionan di komunikashon ku e no tabatin idea na un promé instante ku e tabata na barika. Pues muchu ménos e tabata sa ku e tabata haña oochi te ku dos siman promé ku nasementu di e promé beibi.

E muhé a indiká ku su periodonan mensual a para, pero el a pensa ku esaki simplemente ta debí na strès. Tabata despues ku el a disidí di hasi un tèst i esaki a resultá positivo. Inkluso pa motibu ku e no tabatin un barika di un persona na estado. Esaki aparentemente, segun dòkter, pa motibu ku e beibinan tabata drumí di un otro forma kontra di su lomba.

Green tabatin un parto prematuro, na momentu ku e tabatin apénas 26 siman di embaraso. Dòkternan no tabatin otro opshon ku simplemente saka un di e beibinan, lagando e otro. Tabata asina ku Presley a nase, ku un peso di 680 gram.

Promé ku Green por a duna lus na e siguiente beibi, un yu muhé, e kontrakshonnan a para i dòkternan a mand’é kas. Despues di un total di 12 dia, e muhé a hanja un infekshon potensialmente mortal.

Na momentu ku Green no kier a kore rísiko di pone su beibi na peliger, dòkternan a disidí di hasi un operashon. Di e forma ai Paisley a nase, ku peso di 1.1 kilo.

Durante e último sinku lunanan tras di lomba, e oochinan a keda bou di opservashon di e sentro médiko i algun dia pasá por a bai kas.